რუსთავი 2-ის დამფუძნებელს, დავით დვალს არ სჯერა, რომ ტელეკომპანიაში ძველი სარედაქციო პოლიტიკა შენარჩუნდება.

"[ქიბარ ხალვაშის] დღევანდელი განცხადებიდან გამომდინარე, მგონია, რომ ის ფორმა, როგორიც ჰქონდა რუსთავი 2-ს აღარ ექნება, რაც იქნება ძალიან ცუდი ქვეყნისთვის", — განაცხადა დავით დვალმა რუსთავი 2-თან საუბრისას.

გარდა ამისა, დვალმა დააკონკრეტა, რომ მასსა და სამართლიანობას აღდგენას შორის ერთი ადამიანი დგას და ის ქართული ოცნების თავმჯდომარე, ბიძინა ივანიშვილია. მისივე თქმით, სწორედ ის წყვეტს, ქიბარ ხალვაში დათმობს თუ არა წილებს.

"დღევანდელ განცხადებაში აქცენტს ვაკეთებთ იმაზე, რომ გვინდოდა და გვინდა, რომ სამართლებრივი მექანიზმი გვეჭიროს. დაზარალებულებად რადგანაც გვცნო პროკურატურამ, წინ წაწიოს საქმე და სამართლებრივი ბერკეტი დაგვიტოვოს ბრძოლისთვის. აქ გვგონია პრობლემა, რომ ბიძინა ივანიშვილი წყვეტს არა მხოლოდ ქიბარ ხალვაში რას გვეტყვის, არამედ იმასაც, რომ პროკურატურა დუმს და თაროზე აქვს შემოდებული საქმე", — აღნიშნა დვალმა.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც დავით დვალსა და ჯარჯი აქიმიძეს კუთვნილი 30-30 პროცენტიანი წილის დათმობა მოუწიათ.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირებასთან ერთად მან არხის წილები დათმო . საბოლოოდ, 2011 წელს, კომპანიის მფლობელები შპს საქართველო და ძმები ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.