დღეს, საზოგადოებრივ მაუწყებელში შრომითი გარემოს კვლევის შედეგების წარდგენისას, საზმაუს პროფკავშირების, მენეჯმენტის და არასამთავრობო ორგანიზაციების წარმომადგენლებმა პოლიტიკური რეკლამის განთავსების საკითხზე და წამოჭრილ პრობლემებზე ისაუბრეს.

საერთაშორისო გამჭვირვალობა- საქართველოს წარმომადგენლებმა აღნიშნეს, რომ საზოგადოებრივი მაუწყებელი იდგა პრობლემის წინაშე, როცა საქმე ცენტრისტებისა და პატრიოტთა ალიანსის რეკლამის გაშუქებას ეხებოდა.

მაუწყებელს არ ჰყავს კონკრეტული თანამშრომელი, რომელიც რეკლამების შინაარსს და მისი განთავსების სადავოობას შეისწავლის.

სერგი გვარჯალაძე

საზოგადოებრივი მაუწყებლის მედია წარმოების დირექტორმა სერგი გვარჯალაძემ აღნიშნა, რომ მაუწყებელს არ ჰყავს კონკრეტული თანამშრომელი, რომელიც რეკლამების შინაარსს და მისი განთავსების სადავოობას შეისწავლის. თუმცა, მას შემდეგ, რაც დაფიქსირდა პრობლემური შემთხვევები, ისინი აკონტროლებენ რეკლამის შინაარსს და დარღვევის აღმოჩენის შემთხვევაში პარტიებს მოუწოდებენ ცვლილებისკენ, ან მიმართავენ ცესკო-ს. გვარჯალაძემ აღნიშნა, რომ პატრიოტთა ალიანსის ქსენოფობიური რეკლამის ეთერიდან მოხსნა ერთობლივი გადაწყვეტილება იყო.

"ჩვენ ძალიან ინტენსიურად ვითანამშრომლეთ ფაქტობრივად ყველა არასამთავრობო ორგანიზაციასთან, ინტენსიურად ვიმუშავეთ შიგნით ორგანიზაციაში და მთელი შემადგენლობა იყო ჩართული. ძალიან სწორი, სარისკო გადაწყვეტილება მივიღეთ ერთად."

TI-მ შეხვედრაზე აღნიშნა, რომ ეს არ იყო მხოლოდ მაუწყებლის რეკლამის პრობლემა და სხვა ტელეკომპანიებთან მიმართებაშიც დადგა საკითხი დღის წესრიგში.

"ჩვენ მოვამზადეთ საკანონმდებლო ცვლილებების პროექტი და მას წარვუდგენთ დაინტერესებულ საზოგადოებას. პროექტი შეეხება ამ ტიპის დილემებს და მიცემს მაუწყებელს უფრო მეტ თავისუფლებას მიიღონ გადაწყვეტილებები ასეთი საჩოთირო საკითხების შესახებ, როგორიც არის ერთის მხრივ კანონით დაცული პოლიტიკური რეკლამა და მისი შინაარსი, რაში შესვლის უფლებაც მაუწყებელს არ აქვს, ხოლო მეორე მხრივ ის ღირებულებები, რომელსაც მაუწყებელი აღიარებს. განსაკუთრებით საზოგადოებრივი მაუწყებლის შემთხვევაში, რომელსაც პირდაპირ და ფორმალურადაც აქვს ამ ღირებულებების დაცვის ვალდებულება სხვა კერძო მაუწყებლებისგან განსხვავებით".