შინაგან საქმეთა სამინისტროს ცნობით, დავით გარეჯში ადგილობრივებსა და აზერბაიჯანელ მესაზღვრეებს შორის მცირე ინციდენტი მოხდა, თუმცა მდგომარეობა მალევე განიმუხტა.

"ვითარება დროულად განიმუხტა და ახლა ადგილზე სრული სიმშვიდეა. ფაქტის შესწავლა დაწყებულია", — აცხადებენ შსს-ში.

უწყება საზოგადოებასა და სამოქალაქო ჯგუფებს მოუწოდებს, მისცენ საზღვრის დელიმიტაციის კომისებეს მშვიდ ვითარებაში მუშაობის გაგრძელების შესაძლებლობა.

14 ივლისს, მთელი დღის განმავლობაში, ფეისბუქით ვრცელდებოდა ინფორმაცია, რომ დავით გარეჯთან დაძაბული ვითარება იყო. შინაგან საქმეთა სამინისტრომ მოგვიანებით განმარტა, რომ საქართველო-აზერბაიჯანის სასაზღვრო მონაკვეთზე მშვიდი ვითარებაა.

დავით გარეჯთან დაკავშირებით საქართველო-აზერბაიჯანის საზღვარზე ვითარება ბოლო თვეების განმავლობაში რამდენჯერმე დაიძაბა. აპრილში სამონასტრო კომპლექსთან გზა ოთხი დღის განმავლობაში გადაკეტილი იყო, თუმცა შემდგომში გაიხსნა. 23 მაისს ადგილობრივმა გიდმა ზვიად ანანიაშვილი ფეისბუქზე ფოტოები გაავრცელა, სადაც წერდა, რომ დავით გარეჯში ჩიჩხიტურის მიმართულებით აზერბაიჯანის მხარეს გზა გაჰყავს. პარალელურად, 23-24 მაისს საქართველო-აზერბაიჯანის სახელმწიფო საზღვრის სადელიმიტაციო კომისიის მორიგი სხდომა იმართებოდა ბაქო. მაშინ საგარეო უწყებამ თქვა, რომ სამუშაოები აზერბაიჯანის ტერიტორიაზე მიმდინარეობდა.

25 მაისს უწყებამ განმარტა, რომ სადელიმიტაციო კომისიის სხდომაზე ყველა შეუთანხმებელი მონაკვეთი განიხილეს. სხდომის შედეგების თანახმად, მხარეები სახელმწიფო საზღვრის შეუთანხმებელი მონაკვეთების ერთობლივად დაათვალიერებენ. გარდა ამისა, ისინი მომავალ შეხვედრასაც გამართავენ, რომლიც თარიღიც ჯერ შეთანხმებული არ არის.