საქართველოს საგარეო საქმეთა მინისტრის, დავით ზალკალიანის თქმით, დავით გარეჯში დაწესებული შეზღუდვა ამ დროისთვის მოგვარებულია.

"აზერბაიჯანის ხელისუფლებამ მიიღო გადაწყვეტილება, რომ გახსნას ეს პუნქტები, რომელიც ამ დროისთვის იყო დაკეტილი", — აღნიშნა მინისტრმა.

მისივე თქმით, ისინი მომავალში საქართველო-აზერბაიჯანის საზღვრის დელიმიტაციის პრობლემაზე აქტიურად იმუშავებენ. როგორც ზალკალიანმა აღნიშნა, პროცესი კომისიებში ცვლილებების გამო იყო შეფერხებული.

ინფორმაცია დავით გარეჯში განვითარებულ მოვლენებთან დაკავშირებით დღეს, 25 აპრილს გაავრცელა. გამოცემას დავით გარეჯის მამათა მონასტრის არქიმანდრიტმა, კირიონმა ინტერპრესნიუსს განუცხადა, რომ აზერბაიჯანელმა მესაზღვრეებმა მესამე დღეა უდაბნოს მონასტერი გადაკეტეს და სასულიერო პირებს მონასტერში აღარ უშვებენ.

საგარეო საქმეთა სამინისტროში განაცხადეს, რომ ამასთან დაკავშირებით აზერბაიჯანელ კოლეგებთან კომუნიკაცია მიმდინარეობს. უწყების წარმომადგენელმა, ვლადიმერ კონსტანტინიდმა თქვა, რომ მესაზღვრეების მხრიდან ქედს მიღმა მთამსვლელი ნაკადის შეიზღუდა.

რუსთავი 2-ის ინფორმაციით, მესაზღვრეები აღდგომის ტაძრისკენ მიმავალ ახალ ბილიკებს თხრიდნენ.