გამარჯვებული საქართველოს წევრი, გუბაზ სანიკიძე ამბობს, რომ გამოკითხვაზე არც კი უკადრებიათ, სახელმწიფო გადატრიალების მცდელობაზე მისთვის კითხვები დაესვათ. ამის შესახებ მან საზოგადოებრივ მაუწყებელს განუცხადა. სანიკიძე 20-21 ივნისის საქმეზე თბილისის საქალაქო სასამართლოში მაგისტრატი მოსამართლის თანდასწრებით გამოკითხეს.

"რაც არ ყოფილა, რა უნდა შემეკითხონ. მე ვუთხარი მათ, რომ სახელმწიფო გადატრიალების მცდელობას თუ ეძებენ, ეს უნდა მოკითხონ ხელისუფლებას, რადგან მარტივი საკითხია, გახარია რატომ არ უშვებდა ქართველ მომიტინგეებს პარლამენტის შენობაში, როგორც თვითონ იძახის და რატომ შეუშვეს გავრილოვი. მშვიდად და წყნარად ჩაიარა გამოკითხვამ და წამოვედი", — ამბობს სანიკიძე.

მისივე თქმით, გამოკითხვის პროცესში, შეკითხვებში გამომძიებლების ტენდენციურობა ვერ დაინახა.

"მცდელობაც კი არ ჰქონიათ, კორექტულად იქცეოდნენ და ალბათ, ფიქრობდნენ კიდევაც, რომ ასე ადვილად გასატეხი კაცი არა ვარ", — აღნიშნავს სანიკიძე.

სანიკიძე აცხადებს, რომ გამოკითხვაზე 20-21 ივნისის მოვლენებზე ჰკითხეს, რა დაინახა, სად იყო და რომელი პოლიტიკური ორგანიზაციების ლიდერები იყვნენ პარლამენტთან.

"გამომძიებლებმა კითხვები დამისვეს ნიკა მელიაზე, მოვისმინე თუ არა თითქოსდა, მან თქვა შენობაში შეჭრასთან დაკავშირებით. მე არ მომისმენია, ისიც კი არ ვიცოდი, რომ თურმე მოლაპარაკებები უნდა ყოფილიყო, ეს ტელევიზიით გავიგე. მელიას არც გამოსვლა მინახავს, არც საუბარი. მერე, როცა მივედი, მელია საერთოდ არ მინახავს", — ამბობს გუბაზ სანიკიძე.

20-21 ივნისის საქმეზე ხატია დეკანოიძე, ბაჩუკი ქარდავა, გუბაზ სანიკიძე გამოკითხვაზე 11 ივლისს დაიბარეს.

პროკურატურის განცხადებით, 20 ივნისის აქციის საქმეზე გამოძიება სისხლის სამართლის კოდექსის ორი მუხლით მიმდინარეობს:

  • 225-ე მუხლი: ჯგუფური მოქმედების ორგანიზება ან ხელმძღვანელობა, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმა ისჯება თავისუფლების აღკვეთით ვადით ექვსიდან ცხრა წლამდე;
  • 315-ე მუხლის მე-3 ნაწილი: ამბოხება საქართველოს კონსტიტუციური წყობილების ძალადობით შესაცვლელად, სახელმწიფო ხელისუფლების დასამხობად ან ხელში ჩასაგდებად, რამაც გამოიწვია ადამიანის სიცოცხლის მოსპობა ან სხვა მძიმე შედეგი ისჯება თავისუფლების აღკვეთით ვადით თხუთმეტიდან ოც წლამდე.