შინაგან საქმეთა მინისტრი გიორგი გახარია ამბობს, რომ 20 ივნისის აქციაზე დეპუტატ ნიკა მელიას მიერ გავრცელებული კადრები მხოლოდ ერთ რაკურსს ასახავს. ამის შესახებ გახარიამ გადაცემა რეაქციაში ისაუბრა.

"როდესაც ბატონი ნიკანორ მელია ამას საუბრობს, რასაც აკეთებდა ზუსტად იგივე მომენტში, დაახლოებით 15 წუთის განმავლობაში, სულ სხვა ფლანგებიდან პირდაპირი შტურმი მიმდინარეობდა პარლამენტის შენობაზე. თქვენ შეგიძლიათ აიღოთ ქრონომეტრაჟი თქვენი ტელევიზიების კამერით", — აღნიშნა მინისტრმა.

გადაცემის წამყვანმა, ჰკითხა, რომ როდესაც ნიკა მელია აქციის მონაწილეებს ეკითხებოდა, შესულიყო თუ არა მოლაპარაკებებზე, ეს ხომ არა შტურმს, არამედ მოლაპარაკებებზე წასვლას ნიშნავდა, რაზეც გახარიამ უპასუხა — არა.

"ეს ნიშნავს იმას, რასაც მონტაჟის სახით გვანახეს. ეს არის ერთი რაკურსი. თქვენ რომ შეხედოთ რამდენიმე კამერას, აიღეთ რამდენიმე კამერა და ნახეთ რა ხდებოდა პარლამენტის წინ პარალელურად იმ დროში. და თემა დახურული იქნება. გპირდებით, რომ ამ სტუდიიდან რომ გავალ, ქრონომეტრაჟით მოგაწვდით ოთხ კამერას, რომელიც უჩვენებს ნიკა მელიას და დანარჩენები რა ხდებოდა წინა ხაზზე".

ნაციონალური მოძრაობის დეპუტატი ნიკა მელია, რომელსაც პროკურატურა ძალადობრივი ჯგუფის ხელმძღვანელობას ედავება, 20 ივნისის ღამის ვიდეომასალას გამოაქვეყნა. დეპუტატის თქმით, ეს კადრები ანადგურებს ხელისუფლების პროპაგანდას იმაზე, რომ სროლა პარლამენტში შეჭრის მცდელობას მოყვა. მელია წერს, რომ უწყვეტ კადრებში ჩანს, რომ სროლა მაშინ დაიწყო, როცა ხელისუფლებასთან მოლაპარაკებას აპირებდნენ.