შინაგან საქმეთა სამინისტროს თანამშრომლებმა ვარკეთილში, სამხედრო დასახლებაში ხელყუმბარის აფეთქების ბრალდებით 1977 წელს დაბადებული პირი დააკავეს. შემთხვევა დღეს, 10 ივლისს მოხდა, აფეთქების შედეგად სამი პირი დაშავდა.

შსს-ს ცნობით, ბრალდებულს ურთიერთშელაპარაკება მოუვიდა დაზარალებულებთან. მოგვიანებით კი, შურისძიების ნიადაგზე, ვარკეთილში, ერთ-ერთი კორპუსის სადარბაზოში, ზედა სართულიდან ჩამოაგდო "რგდ"-ის სისტემის ხელყუმბარა.

გამოძიება საქართველოს სისხლის სამართლის კოდექსის მე-19 და 109-ე მუხლის მე-3 ნაწილის "ა" ქვეპუნქტით მიმდინარეობს, რაც დამამძიმებელ გარემოებებში ჩადენილ განზრახ მკვლელობის მცდელობას გულისხმობს. დანაშაული 16-დან 20 წლამდე თავისუფლების აღკვეთას ითვალისწინებს.