ქართული ოცნების აღმასრულებელი მდივანი, ირაკლი კობახიძე მიიჩნევს, რომ ირაკლი ოქრუაშვილის მიმართ ცეცხლის გახსნას არ ჰქონია პოლიტიკური მოტივი და ეს იყო "ჩვეულებრივი შელაპარაკება". ამის შესახებ კობახიძემ ტელეკომპანია პირველის პირდაპირ ეთერში ჩართვისას ისაუბრა:

"ჩვენ პირდაპირ ჩართვამდე ინფორმაციის გამოგზავნა ვთხოვეთ ჩვენს ადგილობრივ შტაბს და ინფორმაცია გვაქვს ასეთი: ირაკლი ოქრუაშვილს გორში, სადგურის დასახლებაში ჰქონდა შეხვედრა და მათ შელაპარაკება ჰქონდათ ერთ–ერთ ადგილობრივთან, სწორედ ამას მოჰყვა ინციდენტი. დაჭრილია ორი ადამიანი. ჩვენ გვაქვს ინფორმაცია, რომ ირაკლი ოქრუაშვილი აპირებს ამ ყველაფერს დაუდოს პოლიტიკური სარჩული. რეალურად იყო შელაპარაკება ადგილობრივ მოსახლესთან და ამ საკითხის პოლიტიზება არ იქნება სწორი. მოხდა ინციდენტი, ამ ინციდენტში ჩართული იყო ორივე მხარე და შესაბამისად, უნდა იყოს გამოძიებული ეს ინციდენტი და დამნაშავეები დასჯილი.

მიუხედავად იმისა, რომ პოლიტიკურ აქციაზე მოხდა ეს ფაქტი, მოტივი ამ ქმედების არ იყო პოლიტიკური

ირაკლი კობახიძე

აქცია იყო პოლიტიკური და ეს ამძაფრებს ვითარებას. განსაკუთრებული ყურადღება ამიტომ არის საჭირო სამართალდამცავი ორგანოების მხრიდან. ერთადერთი რაც შემიძლია ვთქვა, ჩვენი ინფორმაციით, მიუხედავად იმისა, რომ პოლიტიკურ აქციაზე მოხდა ეს ფაქტი, მოტივი ამ ქმედების არ იყო პოლიტიკური, არამედ ეს იყო ჩვეულებრივი შელაპარაკება, რომელიც დაიწყო ოქრუაშვილი მხარდამჭერებსა და კონკრეტულ ადამიანს შორის".

გორის მაჟორიტარი დეპუტატობის კანდიდატს, ირაკლი ოქრუაშვილს, გორში, რკინიგზის სადგურის დასახლებაში იმ დროს ესროლეს, როდესაც ამომრჩეველს ხვდებოდა.

დაჭრილები არიან ოქრუაშვილის თანმხლები ორი პირი, მათ შორის ოქრუაშვილის დაცვის წევრი.

შინაგან საქმეთა სამინისტრომ უკვე დაიწყო გამოძიება ჯანმრთელობის განზრახ მძიმედ დაზიანებისა და იარაღის უკანონო შენახვა–შეძენის ტარების ფაქტზე.