"ქართული ენა მდიდარია ადამიანთა შორის ძმობის გამომხატველი სიტყვებით, მათ შორისაა შენ გენაცვალე, რომლითაც გამოვხატავთ სურვილს შევენაცვლოთ სხვა ადამიანს. დაე, ამგვარი ძმური კავშირი ქრისტიანული დამოკიდებულებით იყოს აღბეჭდილი",- ამ სიტყვებით მიმართა რომის პაპმა ფრანცისკემ სვეტიცხოვლის ტაძარში შეკრებილებს.

რომის პაპმა ილია მეორესა და ტაძარში შეკრებილებს მადლობა გადაუხადა ამაღელვებელი დახვედრისათვის. სვეტიცხოველში მის სიტყვით გამოსვლას ესწრებიან მთავრობის წევრები, ასევე დიპლომატიური კორპუსისა და სამღვდელოების წარმომადგენლები.

რომის პაპმა თქვა, რომ საქართველო არცთუ იშვიათად ყოფილა ყველასგან მიტოვებული, თუმცა უფალს არასოდეს მიუტოვებია ქართული მიწა:

"საქართველოს ისტორია ძველი წიგნივითაა, რომლის ყოველი გვერდიც მოგვითხრობს წმინდა მოწამეებზე და ქრისტიანულ ფასეულობებზე, რომლებმაც განმსჭვალეს ერის სული და ჩამოაყალიბეს მისი კულტურა. ამასთან ეს ძვირფასი წიგნი გვიამბობს გახსნილობის მიღებისა და ინტეგრაციის ნათელ მაგალითებზე. ეს ფასეულობანი ძვირფასი და მარად ღირებულია მთელი რეგიონისათვის.

ეს წმინდა ადგილი საუკუნეების მანძილზე დედაბოძად ედგა ქართულ მეობას. არეულობის დროს მდგრადობას უნარჩუნებდა მას მაშინაც კი როცა და არცთუ იშვიათად ქვეყანა ბედის ანაბარად იყო დარჩენილი. უფალს არასოდეს მიუტოვებია ძვირფასი ქართული მიწა, რამეთუ უფალი ერთგულია ყველა თავისი სიტყვითა და საქმით, შემწეა ყველა დაცემულისთვის და გამმართავი ყველა წელში მოხრილის".

სიტყვით გამოსვლის შემდეგ ფრანცისკემ საქართველოს მარლმადიდებელი ეკლესიის პატრიარქს ილია მეორეს პატივისცემის ნიშნად საჩუქარი გადასცა.