რომის პაპი ფრანცისკე საქართველოში ზუსტად 15:00 საათზე ჩამოვიდა. თბილისის საერთაშორისო აეროპორტში მას პრეზიდენტი, გიორგი მარგველაშვილი და საქართველოს მართლმადიდებელი ეკლესიის კათოლიკოს პატრიარქი, ილია მეორე დახვდნენ.

პაპის საქართველოში ვიზიტის ფარგლებში გიორგი მარგველაშვილსა და ილია მეორეს პირისპირ შეხვდება. პრეზიდენტის სასახლეში გიორგი მარგველაშვილი და რომის პაპი 300-მდე სტუმარს სიტყვით მიმართავენ. ღონისძიებაზე დამსწრეებს შორის არიან აღმასრულებელი, საკანონმდებლო და სასამართლო ხელისუფლების, საერთაშორისო ორგანიზაციების, დიპკორპუსის, საპატრიარქოს და სხვადასხვა რელიგიური კონფესიის წარმომადგენლები.

როგორც პრეზიდენტის საგარეო ურთიერთობათა მდივანმა, თენგიზ ფხალაძემ აღნიშნა, ეს არის უაღრესად მნიშვნელოვანი ვიზიტი საქართველოსთვის:

"ვატიკანი არის ჩვენი უაღრესად მტკიცე მხარდამჭერი საერთაშორისო არენაზე, განსაკუთრებით იმ საკითხში, რაც ეხება საქართველოს ტერიტორიულ მთლიანობას. ეს ვიზიტი ნათლად წარმოაჩენს ჩვენი ურთიერთობების აღმავალ დინამიკას. ეს ვიზიტი ხაზს უსვამს საქართველოს როგორც ერთ-ერთ უძველეს ქრისტიანულ სახელმწიფოს როლსა და ადგილს საერთაშორისო არენაზე. ეს არის უაღრესად კარგი საშუალება, რომ მთელი მსოფლიოს მასშტაბით წარმოვაჩინოთ საქართველო".