იურიდიულ და საპროცედურო საკითხთა კომიტეტების სხდომაზე, სადაც ნაციონალური მოძრაობის დეპუტატის, ნიკა მელიასთვის იმუნიტეტის შეჩერების საკითხს განიხილავენ ქართული ოცნებისა და ევროპული საქართველოს დეპუტატებმა იკამათეს. ევროპული საქართველოს დეპუტატმა, ირაკლი აბესაძემ განაცხადა, რომ მთავრობამ მელიას საკითხი შინაგან საქმეთა მინისტრისა და მისი თანამშრომლების პასუხისმგებლობის საკითხის გადასაფარად წამოჭრა.

"ბიჭო, რა აგონიაში ვარდებით, ასეთ სისულეეებს მართლა როგორ ლაპარაკობთ", — განაცხადა მდინარაძემ პასუხად. ის ამტკიცებდა, რომ ოპოზიციონერ დეპუტატებს განსახილველი თემა არ აინტერესებთ.

ამ საუბარს კამათი მოყვა, რა დროსაც მიკროფონები გათიშული იყო და ხმა არ ისმოდა. საუბარში ჩაერთო ნაციონალური მოძრაობის დეპუტატი სალომე სამადაშვილი. მდინარაძემ მას მიმართა:

"თქვენ მე მიშა სააკაშვილი ხომ არ გგონივართ? ახლა გაგიჟდი მიშას ხსენებაზე ხო. მე არ მაინტერსებს თურმე".

კამათში მმართველი პარტიის დეპუტატი დავით მათიკაშვილიც ჩაერთო და ნაციონალური მოძრაობის დეპუტატს, ხათუნა გრიგოლიშვილს მიმართა საკითხზე, რომელიც მან ნახევარი საათის წინ განიხილა. ამ დროს მდინარაძემ და აბესაძემ კამათი გათიშულ მიკროფონებით გააგრძელეს და უცნობია რას ამბობდნენ ისინი. ამის შემდეგ მდინარაძემ დარბაზი დატოვა.

ადევნეთ თვალი პირდაპირ ეთერს კომიტეტების სხდომიდან.

20 ივნისის აქციაზე ძალადობრივი ჯგუფის ხელმძღვანელობისა და მასში მონაწილეობის ბრალდებასთან დაკავშირებით გუშინ, 25 ივნისს პროკურატურაში ბრიფინგი გაიმართა. უწყებაში ნაციონალური მოძრაობის ლიდერის, ნიკა მელიას წინააღმდეგ მიმდინარე საქმეზე ისაუბრეს. პროკურორის თქმით, მათ მიმართეს პარლამენტს, რათა მიიღონ ნებართვა დეპუტატის დაკავებაზე. მელიას იმუნიტეტი იცავს და მის დასაკავებლად პარლამენტის თანხმობაა საჭირო.