რუსთაველის თეატრთან მსახიობებისა და მოქალაქეების ნაწილმა საპროტესტო აქცია-პერფორმანსი გამართა. მათ თეატრის სამხატვრო ხელმძღვანელის, რობერტ სტურუას პოზიცია გააპროტესტეს თბილისში მიმდინარე ანტისაოკუპაციო აქციის შესახებ. სტურუამ დაწერა: "ბოროტმა სულმა იმარჯვა... ნაცისტები ზეიმობენ: ს ა ქ ა რ თ ვ ე ლ ო აღარ არის!".

აქციის ორგანიზატორებმა სტურუას Кухня მოუწყვეს და ბორში და კოტლეტი მოუმზადეს.

"ბატონო რობიკო, აბა შეეცადეთ და გაიხსენეთ, ბოლოს როდის იყავით დიეტაზე? მართალია! არასდროს ყოფილხართ, და ისიც ხომ იცით დიეტაში რასაც ვგულისხმობთ? ხომ გახსოვთ ბრეხტი, ბატონო რობიკო? და მაიაკოვსკი? კი ბატონო. პრინციპში რას გეკითხებით", — ამბობენ აქციის ინიციატორები.

მათი თქმით რობერტ სტურუას კულტურული დიეტა მოუმზადეს, რათა "მის მოსაქმებულს რაც შეიძლება ნაკლები სიმძაფრის სუნი აუვიდეს".

რობერტ სტურუა ქართული თანამედროვე თეატრისა და კინოს ერთ-ერთი უდიდესი რეჟისორია. მას დადგმული აქვს ისეთი ცნობილი და აღიარებული სპექტაკლები, როგორიცაა "კავკასიური ცარცის წრე", "სამანიშვილის დედინაცვალი", "მეფე ლირი", "ყვარყვარე", "რიჩარდ III" და ა.შ.

სხვადასხვა წლებში მას მიღებული აქვს რუსეთისა და საქართველოს სახელმწიფო პრემიები, საქართველოს ღირსების ორდენი, ჩაპლინ-კლუბის პრემია, მიხეილ თუმანიშვილის სახელობის პრემია, შოთა რუსთაველის სახელობის პრემია და სხვადასხვა საერთაშორისო პრემიები.

ამავე თემაზე: