პარლამენტის მიმდებარე ტერიტორიაზე, იქ სადაც დღეს 19 საათზე მორიგი აქციაა დაგეგმილი, სცენა და ხმის აპარატურა აღარ დგას. ამის შესახებ ინფორმაცია ფეისბუქმომხმარებელმა გიორგი ნონიაშვილმა გაავრცელა. იგი წერს, რომ მერიის განმარტებით, მათ კონსტრუქციები "დროებით დაასაწყობეს".

თბილისის მერიაში აცხადებენ, რომ თბილსერვის ჯგუფმა დღეს გეგმიურად დაასუფთავა პარლამენტის წინ არსებული ტერიტორია, კონსტრუქციები საწყობში წაიღეს, ხოლო გახმოვანების აპარატურა ადგილზე არ დახვდათ.

"გვინდა ხაზგასმით განვაცხადოთ, რომ თბილსერვის ჯგუფის მიზანი არ ყოფილა აქციისთვის ხელის შეშლა, ჩვენი მიზანი იყო მხოლოდ და მხოლოდ ტერიტორიის დასუფთავება. რაც შეეხება აქციისთვის საჭირო კონსტრუქციას, იგი უახლოეს დროში დაბრუნდება რუსთაველის გამზირზე", — ნათქვამია განცხადებაში.