რუსი დეპუტატისა და მართლმადიდებლობის საპარლამენტთაშორისო ასამბლეის პრეზიდენტი, სერგეი გავრილოვი ამბობს, რომ რუსი დეპუტატებისთვის საქართველოს სპიკერის სავარძელი არც თუ ისე კომფორტული ადგილია. ამის შესახებ მას პროპაგანდისტული არხის, რასია 1-ის ეთერში, გადაცემა 60 წუთში განაცხადა. მისივე თქმით, რუსი დეპუტატები არ ილტვიან ამ ადგილის დასაკავებლად.

20 ივნისს, ასამბლეის გახსნის დღეს პარლამენტის პლენარულ სხდომათა დარბაზში სერგეი გავრილოვი სპიკერის სავარძელზე დაჯდა. ამ დიდი უკმაყოფილება გამოიწვია როგორც ოპოზიციაში, ისე სამოქალაქო სექტორში.

ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

თბილისში განვითარებულ მოვლენებზე გავრილოვმა განაცხადა, რომ ეს სააკაშვილთან დაკავშირებული, რადიკალური პოლიტიკური ძალების ნამოქმედარია. გარდა ამისა, ის აღნიშნავს, რომ სკამზე მასპინძელი ქვეყნის, საქართველოს მითითებით დაჯდა.

ამავე თემაზე: