პოტერჰედებო, როულინგის ფანებო და ფენტეზის სამყაროს მოყვარულებო, თვალები ფართოდ გაახილეთ, კომფორტულად მოკალათდით და მოემზადეთ - ჯადოსნური ცხოველები გიახლოვდებიან.

ახალი ტრეილერი გამოვიდა!

ჯადოქრობა, რომელიც აქამდე ჰარი პოტერშიც კი არ შეგხვედრიათ, ჯადოსნური ცხოველები, რომლებზეც აქამდე არც კი გსმენიათ და ცნობილი ვარსკვლავები, რომლებიც არაერთ გენიალურ ფილმში გინახავთ, თქვენთვის როულინგის წიგნს, ჯადოსნური ცხოველები და სად ვიპოვოთ ისინი გააცოცხლებენ.

ეს ყველაფერი კი ძალიან მალე, 18 ნოემბერს მოხდება.

მათთვის, ვისაც ჯერ არ სმენია, ასეთების არსებობის არ გვჯერა მაგრამ მაინც, მოკლე მიმოხილვა:

სიუჟეტი არც ჰოგვორტსში ვითარდება, არც ლონდონში და არც მრუდე ქუჩაზე. ფილმი ნიუ-იორკის ჯადოქრული სამყაროს ისტორიას გვიამბობს. მოვლენები ჰარი პოტერის დაბადებამდე 70 წლით ადრე ვითარდება. მთავარი პერსონაჟი ახალგაზრდა მწერალი ნიუტ სკამანდერია. კიდევ ერთი კარგი ამბავი ისაა, რომ ფილმის რეჟისორი როულინგზე არანაკლები ჯადოქარი დევიდ ეითსია. დიახ, სწორედ ის დევიდ ეითსი, რომელმაც ემა ვოტსონი, დენიელ რედკლიფი და რუპერტ გრინი დაამტკიცა თქვენთვის საყვარელი გმირების როლებზე.

Warner Bros-მა მაყურებლისთვის მსუყე ტრეილერი გაიმეტა. თამამად შეიძლება ითქვას, რომ ტრეილერი ინფორმაციულია. შეგვიძლია ვივარაუდოთ რომ ბასილისკო და არაგოგი საშიში ურჩხულების სიაში პირველობას მაშინვე დაკარგავენ, როგორც კი ეს ფილმი ეკრანებზე გამოჩნდება. ისიც შესაძლებელია, ვოლდემორისა და დამბლდორის შერკინებამაც დაკარგოს პირველობა ყველაზე მომაჯადოებელ ჯადოქრულ დუელებში (ისედაც სადავო იყო გრინდევალდთან შერკინების გამო) და მეორე ადგილზე გადაინაცვლოს. ამის თქმისას მეტი სიფრთხილე მმართებს, მაგრამ არის შანსი, გოგოების გული დენიელ რედკლიფზე მეტად ედი რედმეინმა მოიგოს. გაწეწილი თმით, თხელი აღნაგობით და თავგადასავლების სიყვარულით ეს პერსონაჟი ძალიან ჰგავს ჰარი პოტერს. ერთი მნიშვნელოვანი განსხვავებით - ედი რედმეინს იმდენად არ გაუმართლა, რომ ემა ვოტსონს და რუპერტ გრინს მეგობრად მიეღოთ. მაგრამ გულახდილად რომ ვთქვათ ისიც კარგ გარემოცვაში მოხდა - კოლინ ფარელი, ეზრა მილერი, ჯონ ვოიტი, დენ ფოლერი და სხვა ცნობილი თუ ახალბედა შემსრულებლები თქვენთვის ეკრანზე შთამბეჭდავ პერსონაჟებს გააცოცხლებენ.

ტრეილერს კარგად მოუსმინეთ? მაშინ აუცილებლად მოკრავდით ყურს ნაცნობ მელოდიას. პოტერის შრიფტად წოდებული ფონტებიც მოგხვდებოდათ თვალში. ეს ყველაფერი იმისთვის კეთდება, რომ ფილმმა პოტერჰედებთან კავშირი არ დაკარგოს და ხაზი გაუსვას, რომ ეს ფილმი, ისევე როგორც წიგნი, სწორედ მათთვის და მათი თხოვნით შეიქმნა. ეს ლოგიკურად მაღალი რეიტინგის გარანტიაა, განსაკუთრებით მას შემდეგ, რაც როულინგის ახალი წიგნისა და სპექტაკლის პრემიერამ ინგლისში რეკორდული შედეგი აჩვენა.