ბიზნესმენი ლევან ვასაძე არამარტო ლგბტ წევრებსა და პოლიციას, არამედ დიპლომატიურ წარმომადგენლებსა და უცხოელ ტურისტებსაც დაემუქრა. ვასაძემ შეურაცხმყოფელად მოიხსენია ელჩი (არ დაუკონკრეტებია რომელი) და განაცხადა, რომ, თუ ჭკუის სწავლებას არ შეეშვება, მასაც ქამრით შეუკრავენ ხელებს.

"ის ტუტუცი, უცხოელი ელჩი, რომელსაც არ ესმის, რომ მისი საქმე არის საელჩოში ჯდომა და ელჩობა, რომელიც გამოდის ქუჩაში და გვასწავლის ჭკუას, ესხმის თავს ჩვენი სახელმწიფოს წარმომადგენლებს და ჩვენი ეკლესიის ხელმძღვანელობას უშრობს სისხლს, ის აღარ არის ელჩი, თუ უნდა, რომ ხელები შევუკრათ თავის დაცვიანად, არც ეგ არის პრობლემა და მივაბრძანებთ თავის საელჩოში", — იმუქრებოდა ის.

ამ განცხადებების მიუხედავად ბიზნესმენი ამტკიცებდა, რომ ისინი "სუფთა ხელებით" მიდიან. მისი თქმით, ძალადობის წინააღმდეგია და ამისკენ არ მოუწოდებს, თუმცა "მედია დააბრალებს".

"ქართლის დედას კარგად დააკვირდნენ [პრაიდის უცხოელი სტუმრები], ორი რამე უჭირავს: ღვინის თასი სტუმართმოყვარეობის სიმბოლო და მახვილი. რა თქმა უნდა, ჩვენ მახვილით არავის არ დავხვდებით, ვინც ამაში მიღებს მონაწილეობას, მაგრამ უარყოფით პასუხს გავცემთ. ", — განაცხადა მან.

სავარაუდოდ, ვასაძის კრიტიკის ობიექტი ევროპარლამენტარი რებეკა ჰარმსი გახდა, რომელმაც ღიად გააკრიტიკა მთავრობის პოზიცია თბილისი პრაიდთან დაკავშირებით. მან განაცხადა, რომ საქართველო ვერ ახორციელებს იმას, რაც ევროკავშირთან ასოცირებულმა სხვა ქვეყნებმა შეძლეს. თუმცა, თავად საუბრისას ახსენა ამერიკის საელჩოში მღვდლებისა და ელჩის შეხვედრა.

ლევან ვასაძე თავის ორგანიზებულ "ნამდვილი კაცების" აქციაზე ძალადობრივ მოწოდებებს ავრცელებს და მხარდამჭერებს დაუმორჩილებლობისკენ მოუწოდებს. ის ამბობს, რომ პოლიციას თუ არ "ეყოფა ჭკუა" და კორდონს ჩადგამს მათსა და თბილისი პრაიდის მონაწილეებს შორის, მაშინ მხარდამჭერებთან ერთად მას კომბლებით შეიარაღებული გაარღვევს. ასევე, ვასაძე სახალხო ლეგიონს აანონსებს, რომელიც ლგბტ პირებს ხელების ქამრით შეკვრითა და ყურის აწევით ემუქრება.

ამ საკითხებთან დაკავშირებით შინაგან საქმეთა სამინისტროს ჯერ გამოძიება არ დაუწყია. როგორც On.ge-ს განუცხადეს, თუ უწყებას განცხადება ექნება, თავად გაავრცელებენ.