ევროპარლამენტისა და ევროპის საბჭოს საპარლამენტო ასამბლეის თანაპრეზიდენტის, რებეკა ჰარმსის თქმით, ის გაოცებულია, რომ საქართველო ვერ ახორციელებს იმას, რაც ევროკავშირთან ასოცირებულმა სხვა ქვეყნებმა შეძლეს. ამის შესახებ მან თბილისი პრაიდზე შსს-ს განცხადებასთან დაკავშირებით რუსთავი 2-თან თქვა.

ჰარმსი ამბობს, რომ პრაიდის მსვლელობა ასოცირებულ ქვეყნებში — უკრაინასა და მოლდოვაში ჩატარდა.

"თბილისში ვიზიტის დროს ლგბტ თემის წარმომადგენლებს შევხვდი და ვიცი, რომ მათ თავისუფალი შეკრებისა და გამოხატვის უფლებების გამოყენების დიდი სურვილი აქვთ. ინფორმაცია, რომელიც ამ საკითხზე ვრცელდება, ჩემთვის არ არის დამაჯერებელი. ისე ჩანს, თითქოს საქართველოს მთავრობას არ შეუძლია დაიცვას ეს მსვლელობა... ვთავაზობ მათ, გადახედონ ამ გადაწყვეტილებას", — თქვა ევროპარლამენტარმა.

ის სახალხო დამცველის განცხადებას დაეთანხმა და აღნიშნა, რომ საქართველო არის ქვეყანა, რომელსაც შეუძლია, ღირსების მარშის უსაფრთხოების დაცვა.

რებეკა ჰარმსი თბილისი პრაიდთან დაკავშირებით მთავრობისა და პარლამენტის პოზიციით ლგბტ აქტივისტის, გიორგი თაბაგარის ტვიტის შემდეგ დაინტერესდა. მან თაბაგარის ტვიტი გააზიარა და დაწერა: "მე არ მჯერა, რომ საქართველოს მთავრობასა და პარლამენტის ეს პოზიცია აქვს" და პასუხისთვის საქართველოს პარლამენტის წევრი, თამარ ხულორდავა მონიშნა.

დეპუტატმა უპასუხა რებეკა ჰარმსს და ბრალდებები უარყო: "რას გულისხმობთ? შეშფოთების მიზეზი არ არსებობს. გთხოვთ, გადაამოწმეთ ინფორმაცია. მსგავსი ტიპის კომენტარები აზიანებს ქვეყნის იმიჯს და ვნებს დემოკრატიას".

31 მაისს შინაგან საქმეთა სამინისტრომ პრაიდთან დაკავშირებით განცხადება გაავრცელა, სადაც უწყება აღნიშნავს, რომ დაგეგმილ ფორმატსა და ადგილებში თბილისი პრაიდის ჩატარება შეუძლებელია. საქართველოში თბილისი პრაიდის კვირეული 18-დან 23 ივნისის ჩათვლით გაიმართება. პრაიდის კვირეული ღირსების მარშით დასრულდება.

ამავე თემაზე: