საპატრიარქოს პრესსამსახურის წარმომადგენელი ანდრია ჯაღმაიძე საქართველოს კანცელარიასთან ჰომოფობიური დაჯგუფებების აქციაზე მივიდა. მისი თქმით, ადგილზე ვითარება აინტერესებდა.

"საპატრიარქომ გააკეთა განცხადება, მეტი არაფრის თქმას არ ვაპირებ. მე ვფიქრობ, რომ მთელი პასუხიმგებლობა უნდა აიღოს იმ ორგანიზაციამ თავის თავზე, ვინც წაახალისა ასეთი ქმედებები. ჩვენ ვხედავთ საზოგადოებაში დაძაბულობას, ამიტომ საპატრიარქოს განცხადება იყო პრევენციული, მოწოდება იმისაკენ, რომ არ მოხდეს სამოქალაქო დაპირისპირება და მიუხედავად ამისა, როდესაც წინასწარ იციან საზოგადოების განწყობა მაინც ხდება ასეთი ქმედებების ორგანიზება, მთელი პასუხიმგებლობა უნდა აიღონ მათ, ვინც ეს ორგანიზება მოახდინა", — განაცხადა ჯაღმაიძემ.

ადგილზე სასულიერო პირები ამ დრომდე რჩებიან და ლგბტ თემის წარმომადგენლებსა და მხარდამჭერებს დაშლისკენ მოუწოდებენ.

საპატრიარქოს განცხადებას გამოეხმაურა სახალხო დამცველი ნინო ლომჯარია. მისი თქმით, ამ განცხადებაში დაინახა, რომ ისინი ძალადობას ემიჯნებიან. ლომჯარიამ აღნიშნა, რომ საპატრიარქო დამოუკიდებელი ორგანიზაციაა, რომლის პოზიციასაც ვერ შეაფასებს.

კონტრაქციის მონაწილეები სიტყვიერ შეურაცხყოფას აყენებდნენ აქტივისტებს და აგინებდნენ მათ. პოლიციამ კონტრაქციაზე 8 პირი დააკავა.

მართლმადიდებელი ეკლესიის საპატრიარქო ხელისუფლებას მოუწოდებს, თბილისი პრაიდი არ დაუშვას. თავის განცხადებაში საპატრიარქო მოუწოდებს საელჩოებს, საერთაშორისო ორგანიზაციებს, სახალხო დამცველს და სხვა ინსტიტუციებს, რათა "გამოიჩინონ უფრო ფრთხილი დამოკიდებულება" და არ წაახალისონ მსგავსი აქტივობები.

საპატრიარქო აღნიშნავს, რომ ლგბტ თემი და მათი მხარდამჭერები უცხო ქვეყნებს ისე აწვდიან ინფორმაციას, "თითქოს საქართველოში ისინი დიდად შევიწროებულნი და დევნილნი არიან და ამ მოტივით სერიოზულ დაფინანსებას იღებენ".

"როდესაც მცირე ჯგუფი ცდილობს თავისი პოზიცია თავს მოახვიოს მთელ მოსახლეობას, ეს, თავისთავად, იწვევს მკვეთრ უკურეაქციას, ვინაიდან წარმოადგენს მიზანმიმართულ ქმედებას, უმრავლესობის ღირსების შეურაცხყოფას, მათ არჩევანზე ძალადობას და ამდენად არის მაპროვოცირებელი არეულობისა და დაპირისპირებისა", — აღნიშნულია განცხადებაში.

გაიგეთ მეტი: