რუსეთის საკითხებში პრემიერის სპეციალური წარმომადგენელი ზურაბ აბაშიძე ამბობს, რომ ქვეყანა, რომელსაც მილიონიანა არმია და ბირთვული იარაღი აქვს, მეზობლებს მუქარისშემცველი ენით არ უნდა ესაუბრებოდეს.

"როცა მესმის ხოლმე, რუსეთის ფედერაციის ოფიციალური წარმომადგენლების მხრიდან ასეთი მუქარისშემცველი განცხადებები, სიმართლე გითხრათ, ხანდახან, რაღაც უხერხულობა მეუფლება. გაეროს უშიშროების საბჭოს წევრი ქვეყანა, გეოგრაფიულად მსოფლიოში ყველაზე დიდი სახელმწიფო, მილიონიანი არმიით, ბირთვული იარაღით, მეზობლებს ასეთი ენით არ უნდა ელაპარაკებოდეს. თუ ეს რაღაც სიძლიერის დემონსტრირებაა, ვფიქრობ, საპირისპირო შედეგს აღწევს", — განუცხადა ზურაბ აბაშიძემ ტელეკომპანია იმედს.

პრაღაში მორიგი შეხვედრის დაწყების წინ რუსეთის საგარეო საქმეთა მინისტრის მოადგილემ, გრიგორი კარასინმა კიდევ ერთხელ განაცხადა, რომ საქართველოს ნატოში ინტეგრაცია რუსეთს აშფოთებს.

"აშშ-ს სახელმწიფო მდივანმა მაიკ პომპეომ ღიად განაცხადა, რომ საჭიროა ნატოში საქართველოს დაჩქარებული მიღება. ეს ჩვენთვის არათუ შემაშფოთებელია, რაც ძალიან რბილ ნათქვამს წარმოადგენს, არამედ იგი, ჩვენი აზრით დამღუპველად იმოქმედებს ჩვენს ურთიერთობაზე", — განუცხადა კარასინმა რადიო თავისუფლებას.