რუსეთის საგარეო საქმეთა მინისტრის მოადგილე, გრიგორი კარასინი ამბობს, რომ ნატოში საქართველოს დაჩქარებული მიღება ორ ქვეყანას შორის ურთიერთობაზე დამღუპველად იმოქმედებს. ამის შესახებ მან რადიო თავისუფლებას ინტერვიუს დროს განუცხადა.

"აშშ-ს სახელმწიფო მდივანმა მაიკ პომპეომ ღიად განაცხადა, რომ საჭიროა ნატოში საქართველოს დაჩქარებული მიღება. ეს ჩვენთვის არათუ შემაშფოთებელია, რაც ძალიან რბილ ნათქვამს წარმოადგენს, არამედ იგი, ჩვენი აზრით დამღუპველად იმოქმედებს ჩვენს ურთიერთობაზე", — აღნიშნა კარასინმა. მისივე თქმით, ორმხრივ ურთიერთობების ატმოსფეროს, ის არაა მარტივი.

"რაც უფრო მეტად ვშორდებით სააკაშვილის პერიოდის მტრობისა და კონფრონტაციულობის ჩიხს, თავ ვაღწევთ ყველა სიძნელესა და ვამყარებთ ნორმალურ ურთიერთობებს ადამიანებს შორის, მით ურო მეტად იგრძნობა ნერვიულობა ვაშინგტონსა და ბრიუსელში, მხედველობაში მაქვს ნატოში. ასეთი წინააღმდეგობა, რაღაცნაირად უნდა დაიძლიოს. დასავლეთში ნერვიულობა გამოწვეულია პირველ რიგში იმით, რომ ურთიერთობები მყარდება. ეს ადამიანები მიიჩნევენ, რომ საქართველო არის შემადგენელი ნაწილი გარკვეული ბლოკის, რომელზეც რუსეთის ფედერაციის წინააღმდეგ მიმართულ გარკვეულ საქმიანობაში დაყრდნობა შეიძლება", — განაცხადა გრიგორი კარასინმა.

პრაღაში პრემიერ-მინისტრის სპეციალური წარმომადგენლის, ზურაბ აბაშიძისა და რუსეთის საგარეო საქმეთა მინისტრის მოადგილის, გრიგორი კარასინის მორიგი შეხვედრა გაიმართება. ზურაბ აბაშიძის თქმით, შეხვედრაზე სავაჭრო-ეკონომიკურ ურთიერთობებზე ისაუბრებენ.

"ზოგადად ვიმსჯელებთ 2011 წლის შეთანხმებაზე საბაჟო მონიტორინგის თაობაზე. ჩვენი ინიციტივით ვაყენებთ ამ საკითხებს. ოკუპირებულ ტერიტორიებზე არსებულ ვითარებასთან, მილიტარიზაცისთან, ადამიანის უფლებების უხეშ დარღვევასთან, ზოგადად საერთაშორისო სამართლის, ჩვენი ტერიტორიული მთლიანობის, სუვერენიტეტის ხელყოფასთან დაკავშირებით, ჩვენ ყოველთვის ვსაუბრობთ ხოლმე", — განუცხადა პრემიერის სპეციალურმა წარმომადგენელმა რუსთავი 2-ს.