შინაგან საქმეთა სამინისტროს ცნობით, Qartli.ge-ს ჟურნალისტის განცხადებაზე იმის შესახებ, რომ სამართალდამცავებმა პროფესიულ საქმიანობაში ხელი შეუშალეს გენერალურმა ინსპექციამ მოკვლევა დაიწყო. თუმცა, Qartli.ge აცხადებდა იმასაც, რომ მათ ჟურნალისტს პოლიციელებმა ფიზიკური შეურაცხყოფაც მიაყენეს.

"თავს 10-მდე პოლიციელი დამესხა. ერთმა ტელეფონის წართმევა სცადა, მეორემ ხელი მკრა და ბეჭებში ჩამარტყა. დანარჩენებმა ძალის გამოყენებით დამატოვებინეს ტერიტორია. არ უნდოდათ, რომ ავარია გადამეღო. სავარაუდოდ, დაფარვა სურდათ, არც საგამოძიებო მოქმედებები მიმდინარეობდა", — ამბობს Qartli.ge-ს ჟურნალისტი.

შსს-ს განცხადებით, 10 ივნისს გამთენიისას ალკოჰოლური თრობის ქვეშ მყოფმა არასრულწლოვანმა პოლიციის მანქანა გაიტაცა. მათი თქმით, მაღალი სიჩქარით მოძრავი მანქანა ავტომაგისტრალზე ფორდ ტრანზიტს შეეჯახა. მათივე თქმით, ბრალდებულმა მანქანა დატოვა და მიიმალა. სწორედ ამ მანქანის გადაღებისას მოხდა ინციდენტი პოლიციასა და ჟურნალისტს შორის.