Qartli.ge-ს ინფორმაციით, მათ ჟურნალისტს, რომელიც ავტობანზე ავარიის დროს ამოტრიალებულ პოლიციის მანქანას იღებდა, პოლიციელებმა ფიზიკური შეურაცხყოფა მიაყენეს. გამოცემამ შემთხვევის ამსახველი ვიდეოც გაავრცელა.

"თავს 10-მდე პოლიციელი დამესხა. ერთმა ტელეფონის წართმევა სცადა, მეორემ ხელი მკრა და ბეჭებში ჩამარტყა. დანარჩენებმა ძალის გამოყენებით დამატოვებინეს ტერიტორია. არ უნდოდათ რომ ავარია გადამეღო. სავარაუდოდ, დაფარვა სურდათ, არც საგამოძიებო მოქმედებები მიმდინარეობდა", — ამბობს ჟურნალისტი Qartli.ge-სთან საუბრისას.

შინაგან საქმეთა სამინისტროში ჟურნალისტის საქმიანობის ხელის შეშლის მუხლით გამოძიება არ დაწყებულა. უწყება ამ ინციდენტის შესწავლაც არ დაუწყია.

"მომართვის შემთხვევაში შინაგან საქმეთა სამინისტროს გენერალური ინსპექცია დაიწყებს შესწავლას, ადგილი ჰქონდა თუ არა ჟურნალისტურ საქმიანობაში ხელის შეშლის შესაძლო ფაქტს", — განმარტავს შსს.