შინაგან საქმეთა სამინისტროს განცხადებით, მათი მანქანა, რომელიც გორში ამოტრიალდა, არასრულწლოვნის გატაცებული იყო. უწყებაში ამბობენ, რომ ბრალდებული წარსულში ქურდობისთვის ნასამართლევი და ამჟამად პირობითი მსჯავრის ქვეშ მყოფი პირია.

მათი განმარტებით, 10 ივნისს გამთენიისას გორში, გურამიშვილის ქუჩაზე, ტარდებოდა ოპერატიული ღონისძიება, რა დროსაც ალკოჰოლური თრობის ქვეშ მყოფი არასრულწლოვანი ჩაჯდა სამართალდამცველის სამსახურებრივ მანქანაში და დიდი სისწრაფით თბილისი-სენაკი-ლესელიძის ჩქაროსნულ ავტომაგისტრალზე გავიდა. მათივე თქმით, ბრალდებულმა ვერ უზრუნველყო ავტომანქანის უსაფრთხო მართვა და ავტომაგისტრალზე მოძრავ ფორდ ტრანზიტს შეეჯახა. შსს-ში ამბობენ, რომ არასრულწლოვანმა ავტომობილი შემთხვევის ადგილზე მიატოვა, თავად კი მიიმალა.

უწყების განცხადებით, სამართალდამცველებმა მის ადგილსამყოფელს მალევე მიაკვლიეს და დააკავეს. მომხდარზე გამოძიება საქართველოს სისხლის სამართლის კოდექსის 178-ე მუხლის მე-3 ნაწილის "ე" ქვეპუნქტით მიმდინარეობს, რაც სატრანსპორტო საშუალების ძარცვას ნიშნავს. ამ მუხლით გათვალისწინებული დანაშაული ისჯება თავისუფლების აღკვეთით ვადით ხუთიდან რვა წლამდე.