ადამიანის უფლებათა კომიტეტის სხდომაზე მმართველი პარტიის დეპუტატმა, ნუკრი ქანთარიამ ისაუბრა იმაზე, თუ როგორ წარმოუდგენია სამშობლოს დღე. ქანთარიამ თქვა, რომ მის იდეას ბევრი დასცინებს, თუმცა აღნიშნა, რომ მოქილიკე ნებისმიერ იდეას უჩნდება. მაგალითად მან ამერიკის დამოუკიდებლობის დეკლარაციის მიღება მოიყვანა.

"სკეპტიკოსების და მოქილიკეების აზრი იქნება და გითხარით ესეც. არ არსეობს იდეა, რომელსაც არ ყავდეს თავისი გამკილავი. არ არსებობს სივრცეში ეგეთი, არამარტო ჩვენთან, საერთოდ. დამოუკიდებლობის დეკლარაციას, როცა იღებდნენ მაშინაც იყო ძალიან დიდი წინააღმდეგობა და ძალიან ბევრი ქილიკი", — განაცხადა მან.

ქანთარიამ განმარტა, რომ ქვეყანას აუცილებლად სჭირდება ერთი საერო დღესასწაული, რომელიც აღადგენს სულიერ კავშირს წარსულის მნიშვნელოვან მოვლენებთან. მისი თქმით, ყველა პრობლემის გასაღები წარსულში დევს, თუ "კარგად ჩავუკირკიტდებით", აუცილებლად ვიპოვით გამოსავალს.

მმართველი პარტიის დეპუტატს სურს, სამშობლოს დღე 14 მაისს, თამარ მეფის ხსენების საეკლესიო დღესასწაულზე დაწესდეს.