გადაცემაში შეხვედრები რეგიონულ მედიასთან ერთ-ერთი ჟურნალისტმა განაცხადა, რომ 2013 წელს თეთრწყაროში საავადმყოფო დაიხურა. მან აღნიშნა, რომ ამასთან დაკავშირებით პრეზიდენტისგან მოსახლეობამ კონკრეტული დაპირება მიიღო, თუმცა არ შეასრულა.

ყოფილმა პრემიერმა, ბიძინა ივანიშვილმა კი ჟურნალისტს აუხსნა, რომ გიორგი მარგველაშვილმა თავისი უფლება-მოვალეობების შესახებ არც გაპრეზიდენტებამდე იცოდა რაიმე და არც ახლა იცის:

"ცუდია, რომ რეგიონში ასეთი დამოკიდებულებაა. საერთო დამოკიდებულება ჯანდაცვაზე იცით, რომ ბიუჯეტიდან მეტი რესურსი სწორედ ამ მიმართულებით დაიხარჯა და დღესაც იხარჯება. სერგეენკო ამ მხრივ კარგი მინისტრი და მენეჯერია. ეტყობა ყველაფერს ვერ გავწვდით. რაც შეეხება პრეზიდენტის დაპირებებს, მან არც თავში იცოდა თავისი უფლებები და დღესაც არ ესმის, სამწუხაროდ, რომ ეს მისი სფერო არ არის. პრეზიდენტის სფერო არ არის, რომ საავადმყოფო ააშენოს ან ჯანდაცვას მიხედოს. ეს მთავრობის საქმეა და თუ დარღვევაა, მას უნდა მოვთხოვოთ პასუხი. გვქონდა ეგ საუბარი [პრეზიდენტთან], კონსტიტუცია მანამდე უნდა წაგეკითხა-მეთქი, რომ გაუჩნდა მერე კითხვები, მოვიდა და ყველაფრის მართვა თვითონ რომ უნდოდა, როდესაც არჩევნები დამთავრდა, ეს იყო პრობლემა".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.