რომის პაპმა ფრანცისკემ კათოლიკური ეკლესიის სახელით ბოშებს მრავალსაუკუნოვანი დისკრიმინაციისთვისა და დევნისთვის ბოდიში მოუხადა. BBC-ს ინფორმაციით, რუმინეთში ვიზიტისას ქალაქ ბლაჟში ბოშათა თემს შეხვდა.

ბოშების დიდი ნაწილი ამჟამად ევროპის სამხრეთ ან ცენტრალურ ნაწილში ცხოვრობს. რუმინეთში მათი წილი მთელი მოსახლეობის 10 პროცენტს შეადგენს. ბოშები ხშირად ამბობენ, რომ დისკრიმინაციის გამო მათ უჭირთ სამსახურის დაწყება და ბევრი მათგანი სიღარიბეში ცხოვრობს.

ევროკავშირმა ბოშები ევროპის ყველაზე მსხვილ ეთნიკურ უმცირესობად აღიარა. ნაცისტური გერმანია მათ დევნიდა და ჰოლოკოსტის პერიოდში ასობით ათასი ბოშა მოკლეს.