გადაცემაში შეხვედრები რეგიონულ მედიასთან ჟურნალისტმა ივანიშვილს ეკონომიკურ ფორუმზე მის მიერ გაკეთებული განცხადება შეახსენა, რომლის თანახმადაც ბიზნესმენებმა ქართული ოცნების ხელისუფლებაში ყოფნის პერიოდში მომხდარი ცვლილებების შესახებ საზოგადოებას, ოჯახის წევრებსა და თანამშრომლებს ინფორმაცია უნდა მიაწოდონ.

ჟურნალისტმა, მიხეილ ფეიქრიშვილმა აღნიშნა, რომ ბევრმა ივანიშვილის განცხადება წინასაარჩევნო მოწოდებად აღიქვა, რაზეც ყოფილმა პრემიერმა მიუგო:

"ეს შეიძლება იყო ამოვარდნა იმ გეგმიდან, რაც ადრევე იყო გაცხადებული. ბიზნესმენებთან შეხვედრაზე პოლიტიკურ შემადგენელს არ ელოდნენ და ოპონენტებმა ყურადღება ამაზე გადაიტანეს. მემგონი, აბსოლუტურად ლოგიკური იყო, საარჩევნო პერიოდია, ბიზნესმენი საზოგადოების ჩვეულებრივი წევრია. მოგეხსენებათ, ბიზნესი აფინანსებს პოლიტიკას, წინააღმდეგ შემთხვევაში კორუფციასთან გვაქვს ადგილი, ბიზნესმენებს სხვანაირი შემოსავალი არ გააჩნიათ.

ამ მოწოდებაში არაფერი უცნაური არ იყო, უფრო მკვეთრი დაფიქსირება გამაჩნდა ბიზნესმენების მხრიდან. ამავდროულად მოვუწოდე, რომ კრიტიკაც იყოს გახსნილი და პირდაპირი. ვთქვათ, თუ რაიმე შეცდომებია, გთხოვთ, რომ კრიტიკულად მიუდგეთ. თუ კარგია, იქნებ ესეც მკვეთრად დავაფიქსიროთ. ამ მოწოდებაზე გააკეთეს ოპონენტებმა ზედმეტად კრიტიკული დამოკიდებულება".

ჟურნალისტის შეკითხვას, რას "გრძნობს" ბიზნესი, ივანიშვილმა უპასუხა, რომ ფორუმზე ვერცერთი კრიტიკული შენიშვნა ვერ გამოითქვა:

"ხალხი უნდა დაასაქმოს ბიზნესმა და არა მთავრობამ, მთავრობამ ამის პირობები უნდა შექმნას. იქ იყვნენ ოპოზიციური ძალების წარმომადგენლებიც. იყვნენ ენმ-დან, თავისუფალი დემოკრატებიდან სპეციალისტებიც და პოლიტიკოსებიც. მათ არ მოეწონათ, რომ მე მათ განარტებები ვთხოვე, ჩათვალეს რომ ზედმეტად ემოციური ვიყავი".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.