აჭარის ტელევიზიის დირექტორობის კანდიდატმა, დავით ჩხარტიშვილმა მაუწყებლის ბორდთან გასაუბრებაზე განაცხადა, რომ სამთავრობო გავლენიდან გათავისუფლების შემდეგ ტელევიზია "მეორე უკიდურესობაში გადავარდა". ამ უკიდურესობად კი კანდიდატს "ულტრალიბერალური დისკურსი" მიაჩნია.

"მინდა ხაზგასმით აღვნიშნო, რომ მთელი ამ წლების განმავლობაში მთავრობის მხრიდან, წინა წლებისგან განსხვავებით, არანაირი ზეწოლა არ ყოფილა აჭარის ტეელვიზიაში. მაგრამ ერთი უკიდურესობიდან ტელევიზია ჩავარდა მეორე უკიდურესობაში. კერძოდ, ის ჩავარდა ულტრალიბერალური დაჯგუფების ინტერესთა სფეროში", — განაცხადა ჩხარტიშვილმა.

მანვე აღნიშნა, რომ დირექტორად არჩევის შემთხვევაში ამ სიტუაციას შეცვლის და "ტელევიზიას ყველა დისკურსისთვის განხსნის". ასევე განაცხადა, რომ "ფაქტებს უფრო ამომწურავად და ღრმად" გააშუქებენ.

"კი იქ არსებობდა თავისუფლება, მაგრამ მხოლოდ ერთი დისკურსის ფარგლებში", — განაცხადა მან.

საზოგადოებრივი მაუწყებლის აჭარის ტელევიზიის გენერალური დირექტორის თანამდებობის დასაკავებლად გამოცხადებულ კონკურსზე განცხადებების მიღება დასრულდა. სურვილი სულ ცხრა კანდიდატმა გამოთქვა.

საზოგადობრივი მაუწყებლის აჭარის ტელევიზიის დირექტორის თანამდებობიდან გათავისუფლება, ნათია კაპანაძემ ბათუმის საქალაქო სასამართლოს 30 აპრილს მიმართა. ის ასაჩივრებს არხის მრჩეველთა საბჭოს 19 აპრილის იმ გადაწყვეტილებას, რომლითაც მას იმპიჩმენტი გამოუცხადეს.