იუსტიციის სამინისტრო რუსთავი 2-ის გენერალური დირექტორის, ნიკა გვარამიას განცხადებას "ცარიელ ემოციებზე" აგებულს უწოდებს. უწყება აღნიშნავს, რომ გვარამიას ამ განცხადებას არანაირი მტკიცებულება არ მოჰყოლია. გვარამიამ 25 მაისს თქვა, რომ სტრასბურგში საქართველოს წარმომადგენელი მოსამართლე ლადო ჭანტურია იუსტიციის სამინისტროდან იღებს დავალებებს და საქმის მიმდინარეობის შესახებ მათ ინფორმაციას აწვდის.

იუსტიციის სამინისტროში აღნიშნავენ, რომ ეს განცხადება ძალიან მძიმე ბრალდება და საქართველოს მთავრობისა და სტრასბურგის სასამართლოს შეურაცხყოფაა.

"სამინისტრო მოუწოდებს მას, თავი შეიკავოს სტრასბურგის სასამართლოში მიმდინარე სამართლებრივი დავის პოლიტიზირებისაგან, რადგან დავის ერთ-ერთი მხარის ამგვარი თავდასხმა მოპასუხე მხარესა და დავის განმხილველ სასამართლოზე ეწინააღმდეგება მართლმსაჯულების ინტერესებსა და ევროპული კონვენციის სულისკვეთებას", — ნათქვამია განცხადებაში.

მათივე თქმით, იუსტიციის სამინისტრო, როგორც საქართველოს მთავრობის წარმომადგენელი და მოპასუხე მხარე, მშვიდად ელოდება ევროპული სასამართლოს გადაწყვეტილებას. განცხადებაში უწყება აღნიშნავს, რომ ისინი ზედმიწევნით ასრულებენ მიმდინარე საქმეზე დაკისრებულ დროებით ღონისძიებას და ასევე, შეასრულებენ ამ საქმეზე სტრასბურგის სასამართლოს მიერ მიღებულ ნებისმიერ გადაწყვეტილებას.