ორგანიზაცია მოქალაქის ორგანიზებით ეკონომიკური ფორუმი დაიწყო. როგორც მოქალაქის დამფუძნებელმა, ბიძინა ივანიშვილმა ღონისძიებაზე განაცხადა, ჟურნალისტებს ეკონომიკური საკითხები გაგება უჭირთ, ამიტომ ამ საკითხში ბიზნესმენებმა უნდა იაქტიურონ:

"ძალიან ძნელია ციფრებით შეაფასო, როგორია ქვეყნის ეკონომიკური სტრატეგია და ასეთი ფორუმები მეგონა, რომ ხელს შეუწყობდნენ და ახლაც ამ იმედზე ვარ. მე არჩევნებთან დაკავშირებით რეგიონებში დავდივარ და ვცდილობ მოქალაქეებს ვაჩვენო, რა მოხდა 4 წლის განმავლობაში. საკმაოდ მიჭირს ახსნა, ჟურნალისტებს უჭირთ გაგება ეკონომიკის, რამეთუ ისინი არ არიან ამ სფეროს სპეციალისტები".

მან მიმართა ფორუმზე დამსწრე საზოგადოებას, ეკონომისტებს, ბიზნესმენებსა და რამდენიმე პოლიტიკური პარტიის წარმომადგენელს, რომ სწორედ ისინი არიან ამ სფეროს ყველაზე კარგი შემფასებლები:

"ზოგიერთს ჩემზე კარგი განათება გაქვთ და შეგიძლიათ გააკეთოთ შეფასებები. მაგრამ რამდენად ახერხებთ - ეს კითხვა მაქვს. რამდენად აქტიურობთ, რამდენად ეხმარებით საზოგადოებას. რამდენად ცდილობთ განუმარტოთ და თქვენც თქვენი წვლილი მიიღოთ არჩევნებში? 2012 წელს და 2011 წელს არასდროს დამისვამს ეს შეკითხვა და არ მომიკითხავს ბიზნესი, რამეთუ გარკვეულ მიზეზებს გაგებით ვეკიდებოდი. მინდა ეს კითხვა დავსვა და თითოეულმა ჩაიხედეთ თქვენს თავში, რამდენად აქტიურები ხართ თქვენ დღეს, რამდენად ცდილობთ, რომ განუმარტოთ თუ გინდ თანამშრომლებს და თუ გინდ უფრო ფართო საზოგადოებასაც ის გარდაქმნები, რაც ჩვენს ქვეყანაში შეიცვალა. ან თქვენ თვლით, თვლით, რომ არაფერიც არ მომხდარა".

ივანიშვილმა განმარტა, რომ ფორუმის მოწვევის ერთ-ერთი დანიშნულება არის ის, რომ ეკონომიკის განვითარების უფრო სწორი გზები გამოინახოს.