საქართველოს იუსტიციის საბჭოს დღევანდელ სხდომაზე მოსამართლეობის კანდიდატების შესარჩევი კონკურსის კენჭისყრა გაიმართება. საბჭოს 43 ვაკანტურ ადგილზე 78 კანდიდატს შორის მოუწევს არჩევანის გაკეთება.

კანდიდატებს შორის არის იუსტიციის საბჭოს 4 წევრიც — ვასილ მშვენიერაძე, რევაზ ნადარაია, ირაკლი ბონდარენკო და გიორგი მიქაუტაძე. მიქაუტაძე ამ დროისთვის საბჭოს მდივნის მოვალეობას ასრულებს. ის კონკურსში ორ ვაკანსიაზე მონაწილეობს — თბილისის სააპელაციო სასამართლოს ადმინისტრაციულ საქმეთა პალატაში და თბილისის საქალაქო სასამართლოს ადმინისტრაციულ საქმეთა კოლეგიაში.

საბჭომ კონკურსი რამდენიმე თვის წინ გამოაცხადა, გასაუბრება ყველა კანდიდატთან, დაახლოებით, 6 თვის შემდეგ დასრულდა. სწორედ ეს გახდა, საბჭოს არამოსამართლე წევრების ბრალდებების საფუძველი. ისინი, საბჭოს მოსამართლე წევრებს, კონკურსის მიზანმიმართულ გახანგრძლივებაში ადანაშაულებენ და პროცესს უზენაეს სასამართლოში მოსამართლეთა შერჩევის პროცესს უკავშირებენ.

კენჭისყრა იუსტიციის საბჭოს სხდომის შემდეგ გაიმართება, სადაც დღის წესრიგით, ოთხ საკითხს განიხილავენ. განსახილველ საკითხებს შორის არის, თბილისის სააპელაციო სასამართლოს სამოქალაქო საქმეთა პალატისა და საგამოძიებო კოლეგიის თავმჯდომარეთა დანიშვნის საკითხები.

სააპელაციო სასამართლოში კოლეგიებისა და პალატის წევრთა გადაადგილებაზე საბჭომ გასულ სხდომაზე იმსჯელა. ჯერჯერობით უცნობია, თუ ვის განიხილავს საბჭო სამოქალაქო საქმეთა პალატისა და საგამოძიებო კოლეგიის თავმჯდომარის პოსტზე.