თბილისის მერს, კახა კალაძეს სურს, რომ ყველა მინისტრს მასზე მაღალი რეიტინგი ჰქონდეს, რადგან ეს დადებითად აისახება ქვეყანაზეც. მერმა განცხადება NDI კვლევების შემდეგ გააკეთა, რომლის მიხედვითაც მოსახლეობის 40 პროცენტი კახა კალაძის საქმიანობას დადებითად აფასებს.

"ჩემი საქმიანობიდან გამომდინარე ყოველდღიურ რეჟიმში მაქვს შეხვედრა მოსახლეობასთან. ზუსტად ის დამოკიდებულება, რასაც მე ვგრძნობ ყოველდღიურ რეჟიმში დედაქალაქის მოსახლეობისგან, ეს არის ჩემთვის ძალიან მნიშვნელოვანი. ვისურვებდი, რომ ყველა მინისტრი იყოს ჩემზე მაღლა რეიტინგის თვალსაზრისით, გაკეთებული საქმეებით. ეს ჩემთვის, ჩემი გუნდისთვის იქნება დადებითი და პირველ რიგში ქვეყნისთვის", — განუცხადა მერმა ჟურნალისტებს.

NDI-ს კვლევის მიხედვით, მოსახლეობის 40 პროცენტს პოზიტიური დამოკიდებულება აქვს ჯანდაცვის მინისტრ, დავით სერგეენკოს მიმართაც. გარდა ამისა, 31 პროცენტი დადებითადაა განწყობილი ყოფილი პრეზიდენტის, მიხეილ სააკაშვილის მიმართ.