ზუგდიდში გაერთიანებული ოპოზიციის მერობის კანდიდატი სანდრა რულოვსი აცხადებს, რომ მეორე ტურს არ შეეგუება. მისი თქმით, ზუგდიდში პირველივე ტურში უნდა გაიმარჯვოს.

"განმუხურს მოვიგებთ აქ მეორე არჩევანი არ არსებობს, ისევე როგორც ანაკლიას. მე არ ვიცი რას აპირებენ მეორე ბანაკში, ჯერ თათბირობენ და თუ გამოაცხადებენ პირველ ტურში გამარჯვებას, ჩვენ ამას არ შევეგუებით, იმიტომ, რომ ეს არ შეესაბამება სიმართლეს. პირველი ტური მათ არ აქვთ მოგებული," — განაცხადა სანდრა რულოვსმა.

მან ასევე აღნიშნა, რომ მხოლოდ განმუხურში 60 პასპორტი წაართვეს მოქალაქეებს, იყო მოსყიდვისა და ზეწოლის ფაქტები. მისი თქმით, მზადაა სოფელ-სოფელ მთელი საქართველო შემოიაროს, როგორც რეფერენდუმის დროს ზვიად გამსახურდიამ.

გაერთიანებული ოპოზიციის მონაცემებით, ისინი არჩევნებს შემდეგ უბნებში იგებენ: ანაკლიის #91-ე უბანი 2 ხმით, #77-ე უბანი 30 ხმით, #32-ე უბანი, #98-ე უბანი 50 ხმით, სოფელ რუხის მესამე უბანი 41 ხმით, კახეთის #49-ე უბანი და ანაკლიის #32-ე უბანი.

ქართულ ოცნებაში კი ამბობენ, რომ მათი კანდიდატი ზუგდიდში პირველივე ტურში იმარჯვებს.