სანდრო გირგვლიანის საქმეზე საქალაქო სასამართლომ პროკურატურის მთავარი მოწმე, კუდის ყოფილი თანამშრომელი მიხეილ ბიბილურიძე დაკითხა. ბიბილურიძე 2006 წლის 27 იანვარს შარდენის ქუჩაზე მდებარე კაფეში მომხდარს 3 საათის განმავლობაში იხსენებდა და განმარტა, როგორ გასცა დათა ახალაიამ გირგვლიანის ცემის ბრძანება.

მან განაცხადა, რომ კაფეში ახალაიასა და გირგვლიანს შელაპარაკება მოუვიდათ, რის შემდეგაც გირგვლიანი და მისი მეგობარი, ბუხაიძე კუდის თანამშრომლებმა ოქროყანაში აიყვანეს და ფიზიკურად გაუსწორდნენ. ის ამბობს, რომ გირგვლიანი გაიქცა და თავად მისი გარდაცვალების შესახებ მეორე დღეს, ტელევიზორით შეიტყო:

"ვკითხეთ, რა მოხდა-მეთქი, გიამ მითხრა, ხრამში გადავარდა და გაიყინაო. მე ვუთხარი, ხრამში გადავარდა, გაიყინა, როგორ, ხრამში რა უნდოდა-მეთქი".

დათა ახალაიას ადვოკატი, მალხაზ ველიჯანაშვილი განმარტავს, რომ ბიბილურიძის ჩვენება სიმართლეს არ შეესაბამება:

"ჩვენება არ არის თანხვედრაში არც სხვა მოწმეებთან, არც ფაქტობრივ გარემოებებთან. შესაბამისად, ძალიან მარტივად დადასტურდება უკვე დაცვის მტკიცებულებებით, რომ აბსურდულია ეს ჩვენება, არ გამომდინარეობს რეალობიდან და შესაბამისად, სასამართლოს არ აქვს უფლება საერთოდ რომ გაიზიაროს ასეთი ჩვენება".

სანდრო გირგვლიანი 2006 წლის 26 იანვარს ოქროყანის ტყეში წამებით მოკლეს. საქმე 2006 წლის თებერვალში მას შემდეგ გახმაურდა, რაც იმედის ეთერით გავიდა სიუჟეტი, რომელშიც ჩანდა, რომ შინაგან საქმეთა სამინისტროს მაღალჩინოსნები და ვანო მერაბიშვილის მეუღლე შესაძლოა კავშირში ყოფილიყვნენ მკვლელობის საქმესთან.

დღეს სასამართლომ პროკურატურის მთავარი მოწმე დაკითხა. სასამართლო სხდომა რამდენიმე დღეში განახლდება.