ევროკავშირის ელჩის კარლ ჰარცელის თქმით "ევროკავშირსა და საქართველოს შორის ურთიერთობა არასოდეს ყოფილა ისეთი ახლო, როგორც ახლაა". ამის დასტური იყო სახელმწიფოს წარმომადგენლების თანამონაწილეობა ევროპის დღეზე.

რიყის პარკში ოფიციალურ გახსნაზე საქართელოს პრეზიდენტი, ქვეყნის პრემიერმინისტრი და დედაქალაქის მერი მივიდნენ. მოინახულეს ყველა ზონა, გაეცნენ სხვადასხვა პროგრამებს და აქტივობებს, ღონისძიების მიწურულს სცენიდან სიტყვით იქ შეკრებილ საზოგადოებას მიმართეს.

თბილისის მერიის მხარდაჭერით ევროკავშირი უკვე მეხუთე წელია ევროპის დღეს აღნიშნავს. ღონისძიებამ ბოლო ორი წელია მასშტაბური სახე მიიღო, რომელშიც 20 000-მდე დამსწრე იყრის ხოლმე თავს.

ევროპის დღე წელსაც 5 მაისს რიყის პარკში აღინიშნა. ქალაქის ერთ-ერთი ყველაზე მასშტაბური ღონისძიება ევროკავშირის ორგანიზებით მოეწყო.

12 საათიდან 5 საათამდე რიყის მოედანზე მთელი დღის განმავლობაში საინფორმაციო და გასართობი ღონისძიებები ტარდებოდა. ე.წ. ევროსოფელს 70-ზე მეტი კარავი დაეთმო, სადაც საელჩოებმა თავისი ქვეყნის დამახასიათებელი შემოქმედება თუ აქტივობა წარმოადგინეს. პარკის ტერიტორიაზე განთავსებულ სტენდებზე ღონისძიების სტუმრებს ევროგაერთიანების წევრი ქვეყნების ტრადიციული კერძების დაგემოვნებაც შეეძლოთ.

ევროპის დღის აღნიშვნაში მონაწილეობა არამარტო ევროკავშირის წევრმა სახელმწიფოებმა, არამედ ადგილობრივებმაც მიიღეს. შემოქმედებითი ჯგუფები, ანსამბლები მთელი დღის მანძილზე მუსიკალურ ნომრებს, თამაშებსა და თეატრალურ წარმოდგენებს მართავდნენ.

ღონისძიების ძირითადი ნაწილი ევროკავშირის მიმდინარე პროგრამების გაცნობას დაეთმო, რომლებიც საქართველოს მოქალაქეების განვითარებასა და ხელშეწყობაზეა ორიენტირებული. ასეთი სულ 4 ძირითადი მიმართულებაა: ეკონომიკური განვითარება, მართლმსაჯულება, გარემოს დაცვა და საინფორმაციო ტექნოლოგიები. რომელ სექტორში რა ფინანსური მხარდაჭერა გასწია და შესაბამისად რა შედეგებს მიაღწია ქვეყანამ ინტერაქციული ინსტალაციების საშუალებით გამოსახეს.

4 ძირითად ზონად დაყოფილ რიყის პარკში ყველაზე მეტი მხიარულება საბავშვო ზონაში იყო, სადაც პატარებს ბამბის ნაყინის, ბატი-ბუტის, ევროკავშირის ფერებში მომზადებული ნაყინის დაგემოვნება უფასოდ შეეძლოთ. პარალელურად, სხვადასხვა სამაგიდო თუ ფიზიკური თამაშობები მიმდინარეობდა. თითების თეატრს, ფლეშმობსა და ქართულ-ევროპული ზღაპრებს რიყის პარკის ამფითეატრი დაეთმო.

საღამოს დასკვნითი ნაწილი ევროპის მოედანზე მუსიკალურად დასრულდა, სადაც ჯგუფი 33^ა და DJ ნიკოლი 19:00 საათიდან 23:00 საათამდე იქ შეკრებილი აუდიტორიის მუსიკალურ განწყობაზე ზრუნავდნენ.

ღონისძიების საორგანიზაციო მხარდაჭერა კომპანია კონსიერჟ თბილისმა უზრუნველყო. 100-კაციანი გუნდის დახმარებით სამ დღეში რიყის პარკის ერთი დღით ევროსოფლად გადაქცევა მოხერხდა. იმისთვის, რომ ოჯახის ყველა წევრს თავისთვის საინტერესო მიმართულებების აღმოჩენა შეძლებოდა კონსიერჟ თბილისმა ევროკავშირთან მჭიდრო თანამშრომლობით ღონისძიების შინაარსობრივ ნაწილზეც იმუშავა.

ევროპის დღის დაგეგმვასა და ლოჯისტიკურად ღონისძების აწყობაზე, უკვე მეორე წელია, კონსიერჟ თბილისი ზრუნავს.

ევროპის დღე მიმდინარე წლის განმავლობაში რეგიონებშიც აღინიშნება. პირველი გაჩერება წყალტუბოა.