ალბათ, ჯუმანჯის თავგადასავლებით სავსე ფილმი ბავშვობიდან ყველას გახსოვთ. გუშინ, 12 მაისს, მისი მესამე ნაწილის გადაღებები დასრულდა.

დუეინ ჯონსონი ფანებთან გადაღებების განმავლობაში მუდმივად აზიარებდა ვიდეოებსა და ფოტოებს, ამიტომ გასაკვირი არაა, რომ ფილმის ფინალური ნაწილის დასრულების შემდეგ, მან ფოტო გამოაქვეყნა, რომელზეც ასახულია უდაბნოში მზის ჩასვლისას მოსეირნე ოთხი ვარსკვლავი.

"ხალხს წარმოდგენა არ აქვთ იმაზე, თუ რას ვუმზადებთ... მათი განცვიფრების ოპერაცია ოფიციალურად დაწყებულია", - აკომენტარებს ფოტოზე კევინ ჰარტი.

როგორც ხედავთ, ფოტოზე მარცხნიდან სწორედ კევინ ჰარტია ფრანკლინ ფინბარის როლში, რომელიც დუეინის, სმოლდერ ბრეივსტოუნის როლის შემსრულებლის გვერდზე დგას. რაც შეეხება ჯეკ ბლექს, ის პროფესორ შელდონ ობერონს თამაშობს, ხოლო კარენ გილანი — რუბი რაუნდჰაუსს. გმირებს ჯუმანჯის ტრადიციულ სამოსში ვხედავთ, თუმცა, როგორც ვიცით, მათი თავგადასავლები ცივ კლიმატშიც გრძელდება, ასე რომ, ახალი კოსტიუმებისთვისაც უნდა მოვემზადოთ.

ჯერჯერობით ჯუმანჯი 3-ის შინაარსის შესახებ არაფერი ვიცით, თუმცა, როგორც კევინ ჰარტი ამბობს, მას გაცილებით რისკიანი თავგადასავალი ახლავს თან, ვიდრე მის წინა ფილმს.

კიდევ ერთი საინტერესო რამ, რასაც ჯუმანჯი 3-ში ნახავს მაყურებელი, აქლემზე მოჯირითე კევინ ჰარტია.

ჯუმანჯის გადაღებები ამ წლის იანვარში დაიწყო. ფილმის მესამე ნაწილი ეკრანებზე 2019 წლის 13 დეკემბერს გამოვა.