დღეს ლიეტუვაში პრეზიდენტს ირჩევენ. ადგილობრივი დროით დილის რვა საათზე ქვეყნის მასშტაბით ორი ათასამდე საარჩევნო უბანი გაიხსნა. საპრეზიდენტო არჩევნებთან ერთად ორი რეფერენდუმი ტარდება — ორმაგი მოქალაქეობის შემოღებისა და პარლამენტში დეპუტატების რაოდენობის შემცირებასთან დაკავშირებით.

პრეზიდენტის თანამდებობისთვის ცხრა კანდიდატი იბრძვის. სოციალური გამოკითხვების მიხედვით, საარჩევნო რბოლის ფავორიტები 54 წლის ეკონომისტი გიტანას ნაუსედა, ფინანსთა ყოფილი მინისტრი 44 წლის ინგრიდ შიმონიტე და პრემიერ-მინისტრი 48 წლის საულიუს სკვერნიალისი. ამჟამინდელი პრეზიდენტ დალია გრიბაუსკაიტეს პრეზიდენტობის მეორე ვადა ეწურება და მესამედ კენჭისყრის უფლება არ აქვს.

გამარჯვებისთვის კანდიდატმა ხმების 50 პროცენტზე მეტი უნდა მოიპოვოს. თუ გამარჯვებული კანდიდატი არ დასახელდა, მეორე ტური ორ კვირაში გაიმართება. საარჩევნო უბნები ადგილობრივი დროით საღამოს რვა საათზე დაიხურება.