Disney-მ Frozen 3-ის შესახებ ახალი დეტალები გაასაჯაროვა. პოპულარული ანიმაციური ფრანჩაიზის მესამე ნაწილის პრემიერა 2027 წლის 24 ნოემბერს იგეგმება. ფილმში ანას პერსონაჟს კვლავ კრისტენ ბელი გაახმოვანებს, ხოლო ელზას — იდინა მენზელი. ჯონათან გროფი კრისტოფის როლს დაუბრუნდება, ჯოშ გადი კი — ოლაფის.

Disney-ის D23 ღონისძიებიდან გავიგეთ, რომ Frozen 3-ში ანა და კრისტოფი, როგორც იქნა, ქორწილისთვის ემზადებიან. თუმცა, არ უნდა ველოდოთ, რომ სამეფო ქორწილი მშვიდობიანად ჩაივლის.

ფილმში მაყურებელი ახალ ბოროტმოქმედს გაიცნობს. Disney-ს ჯერ არ გაუმჟღავნებია პერსონაჟის ვინაობა ან მისი მოქმედების მოტივი, თუმცა თამამად შეგვიძლია ვთქვათ, რომ ის ელზასა და ანას მორიგ სახიფათო თავგადასავალში ჩაითრევს.

ასევე, გავრცელებული ინფორმაციით, ფილმში ოლაფის სასიყვარულო ისტორიასაც ვიხილავთ, რომლის მონაწილეც პერსონაჟი, სახელად სამანტა გახდება.

იხილეთ ნაწყვეტი Frozen 3-დან:

Frozen 3-ის გამოსვლა თავდაპირველად 2026 წელს იგეგმებოდა, თუმცა Disney-მ პრემიერის თარიღი 2027 წლის 24 ნოემბრისთვის გადაწია.

როგორც პირველ 2 ფილმში, მუსიკა აქაც ძალიან მნიშვნელოვან როლს ითამაშებს. წინა ნაწილების საუნდტრეკების ავტორები, კრისტენ ანდერსონ-ლოპესი და რობერტ ლოპესი, სიმღერებზე სამუშაოდ კვლავ დაბრუნდნენ.

არენდელის ისტორია მესამე ნაწილით არ დასრულდება. Disney-მ უკვე დაადასტურა, რომ Frozen 4-ზე მუშაობა დაწყებულია — ეს კი იმას ნიშნავს, რომ Frozen 3-ის შემდეგ ელზას, ანასა და მათ მეგობრებს კიდევ ერთი დიდი თავგადასავალი ელოდებათ.