ადამიანის უფლებების სწავლებისა და მონიტორინგის ცენტრის (EMC) ინფორმაციით, სახელმწიფო უსაფრთხოების სამსახურსა და მალხაზ მაჩალიკაშვილის ადვოკატებს შორის შეთანხმება შედგა. შეთანხმდების თანახმად, მაჩალიკაშვილი სუს-ში დაკითხვაზე ხვალ, 10 მაისს, 15:00 საათზე მივა. ინფორმაცია On.ge-ს სუს-ში დაუდასტურეს.

მანამდე სახელმწიფო უსაფრთხოების სამსახურმა მაჩალიკაშვილი დაკითხვაზე დღეს, 9 მაისს 15:00-ზე დაიბარა. მას უწყება დაკითხვის შესახებ სუს-ის თანამშრომლებმა წარუდგინეს, თუმცა ხელი არ მოაწერა და სიტყვიერად განმარტა, რომ კონსულტაციები ადვოკატებთან უნდა გაიაროს. მაჩალიკაშვილი დაკითხვაზე გუშინ, 8 მაისსაც დაიბარეს.

გუშინ მალხაზ მაჩალიკაშვილის ადვოკატმა, მარიამ კუბლაშვილმა თქვა, რომ მაჩალიკაშვილი სახელწიფო უსაფრთხოების სამსახურში 10 მაისს მივა. კუბლაშვილმა On.ge-ს განუმარტა, რომ დაკითხვის გადადების მიზეზი ადვოკატების მხრიდან დროის შეუთანხმებლობაა. მან აღნიშნა, რომ 10 მაისს პროცესის შემდეგ მივა სუს-ში მალხაზ მაჩალიკაშვილთან ერთად.

ფარული ჩანაწერი სავარაუდო ტერაქტზე

7 მაისს სახელმწიფო უსაფრთხოების სამსახურმა ბრიფინგზე განაცხადა, რომ პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

მაჩალიკაშვილის ყველა ბრალდებას უარყოფს და ამბობს, რომ ამით მისი ოჯახის განადგურებას ცდილობენ. ის ამბობს, რომ კარავში რჩება, ბრძოლას გააგრძელებს და თუ დამნაშავეა, მზადაა დააკავონ.

"თუ მე საშიში ვარ ამ ქვეყნისთვის, თუ მე ტერორისტი ვარ რატომ არ მაკავებენ ამდენი ხანი? 2 თვის წინ სადღაც გამწარების დროს ნათქვამი და ჩაწერილი სიტყვების გამო დღეს ტერორისტს მეძახიან. რატომ არ წამასწრეს დანაშაულზე და არ დამაკავეს, თუ ტერორისტი ვარ? კი მე სულ მაქვს სურვილი გავიგო იმ ადამიანების შესახებ მეტი ვინც შვილი მომიკლეს. მაგრამ ეს დანაშაულის ჩადენაა?" — აცხადებს მალხაზ მაჩალიკაშვილი.

ამავე თემაზე: