რუსთავი 2-ის ცხრა პროცენტის წილის მფლობელის, ნინო ნიჟარაძის ადვოკატი, გიორგი ყავლაშვილი ამბობს, რომ მისი კლიენტის სარჩელი ტელეკომპანიის წინააღმდეგ მიმართული არ არის. გადაცემა რეაქციაში საუბრისას ყავლაშვილმა თქვა, რომ სარჩელით თანხების დაკისრება რუსთავი 2-ის სასრგებლოდ არის მოთხოვნილი.

"თუ ვისაუბრებთ იმაზე, რომ ხელისუფლების ხელყოფის ობიექტს წარმოადგენს ტელეკომპანია, მისი სარედაქციო პოლიტიკა და სხვადასხვა საკითხები, რასაც ჩვენ ვემიჯნებით და ნამდვილად არ ვართ მონაწილე ამდაგვარი სურვილების, თუკი ასეთი ბუნებაში არსებობს, ეს შემთხვევა განსხვავდება ყოველგვარი რიტორიკისა და სიტუაციისაგან იმით, რომ აქ პირიქით, თანხები მოთხოვნილია ტელეკომპანიის სასარგებლოდ. მოპასუხეს წარმოადგენენ ტელეკომპანიის მაჟორიტარი პარტნიორები და ტელეკომპანიის დირექტორი. თანხა რომელის დაკისრებასაც ითხოვს ნინო ნიჟარაძე იქნება და გახდება რუსთავი 2-ის საკუთრება", — აღნიშნა ადვოკატმა.

მისივე თქმით, ნინო ლეჟავა თანხას არა ტელეკომპანიისგან არამედ, მისი დირექტორისგან და სხვა მეწილეებისგან ითხოვს. რაც შეეხება რუსთავი 2-ის ძველ საქმეს, გიორგი ყავლაშვილი ამბობს, რომ ნინო ლეჟავა პროცესებში მონაწილეობდა, როგორც ქიბარ ხალვაში მოწინააღმდეგე მხარე. გარდა ამისა, მან განმარტა, რომ სტრასბურგის სასამართლოში უზენაესის გადაწყვეტილება არ გაასაჩივრეს, რადგან მათთვის სასურველი შედეგი დადგა:

"ორ-სამ დღეში ეს შედეგი უკვე არსებობდა. ერთადერთი, ქალბატონ ნინოს და მე, როგორც მის ადვოკატს, თუ დავადანაშაულებთ, არის ის, რომ იმ ორ დღეზე უფრო ჩქარა ვერ იმოქმედა".

ნიკა გვარამიამ 6 მაისს საგანგებო ბრიფინგი გამართა, სადაც თქვა, რომ ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს.

გარდა ამისა, სარჩელის მიხედვით, ნინო ნიჟარაძე შპს სამაუწყებლო კომპანია რუსთავი 2-ის მართვის ორგანოს — პარტნიორთა კრების 2015 წლის ოქმის ნაწილობრივ ბათილად ცნობას ითხოვს. სარჩელში ვკითხულობთ, რომ "ამ ოქმის გასაჩივრებით უნდა დადგინდეს პარტნიორების: გიორგი ყარამანიშვილის, ლევან ყარამანიშვილის და შპს საქართველოს მხრიდან უფლების ბოროტად გამოყენება, რასაც შედეგად მოჰყვა მოპასუხე პარტნიორთა არამართლზომიერი უარი ნინო ნიჟარაძის მხრიდან წილის გასხვისებაზე". იურისტი გიორგი მშვენიერაძე კი აცხადებს, რომ პარტნიორთა კრების ოქმს გასაჩივრების ვადა გასული აქვს.