რუსთავი 2-ის გენერალური დირექტორის, ნიკა გვარამიას განცხადებით, ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს. ამის შესახებ მან საგანგებო ბრიფინგზე განაცხადა.

გვარამია აცხადებს, რომ ამ ყველაფრის მიზანი რუსთავი 2-ის სარედაქციო პოლიტიკის შეცვლაა და ეს სარჩელი კონკრეტულად მას, ამ ყველაფრის გარანტს ეხება. გვარამია ამბობს, რომ მთავარი მოთხოვნა მისი, როგორც დირექტორის, უფლებამოსილების შეწყვეტა იქნება, რაც ქართულმა სასამართლომ ივანიშვილის დავალებით ბევრჯერ სცადა.

"შემოვიდა 9 პროცენტის მფლობელის, ნინო ნიჟარაძის სარჩელი სხვა მეწილეების, პირადად ჩემი და რუსთავი 2-ის გაყიდვების სახლის წინააღმდეგ. ნინო ნიჟარაძე ითხოვს კომპენსაციას დაგროვილი გადასახადების სახით... ითხოვს 2015 წელს, მისი თქმით, გამქრალ 10 მილიონ ლარს გაყიდვების სახლიდან. ითხოვს ჩემგან, რატომ გავზარდე უფასო პოლიტიკური რეკლამების ლიმიტი ოპოზიციის სასარგებლოდ და ამით კომპანიას ზიანი მივაყენე. ითხოვს მილიონ 600 ათას ლარს, რადგან სხვა მეწილეებმა [სხვა პირზე] გაყიდვის უფლება არ მისცეს. საერთო ჯამში, ითხოვს 26 მილიონ ლარს... დავა ქართულ სასამართლოშია შესული და მას ქოჩიაშვილი იხილავს, რომელიც სამოსამართლო კლანის წევრია", — თქვა გვარამიამ.

გვარამია ნინო ნიჟარაძეს სთავაზობს, ქართული სასამართლოდან სარჩელი გამოიტანოს და სხვა ნებისმიერ საერთაშორისო სასამართლოში შეიტანოს. გვარამიას თქმით, ამით ნიჟარაძე დაამტკიცებს, რომ ეს დავა ნამდვილად ორ კერძო პირს შორის არის.