ტელეკომპანია იმედის ტოქ-შოუს სხვა რაკურსის პროდიუსერი მაია სტეფნაძე აცხადებს, რომ სამსახურიდან პოლიტიკური ნიშნით გაათავისუფლეს.

მისივე განმარტებით, მიზეზი პანკისის ხეობის მცხოვრებლების მხარდამჭერ აქციაზე სიტყვით გამოსვლა და სოციალურ ქსელში მხარდამჭერი პოსტის გამოქვეყნება გახდა.

"ტელეკომპანია იმედის დირექტორს, გიორგი კალანდარიშვილსა და ამ ხელისუფლებას მაგრად არ გაუმართლა, რომ მე ზუგდიდელი ქალბატონის, ია კერზაიასავით გული არ გამისკდა. მე გადავრჩი და ახლა ვეღარ გამაჩუმებთ! გაბედეთ და სამსახურიდან გამომაგდეთ ფეისბუქზე დადებული პოსტის გამო, 21 აპრილს, პანკისის ხეობაში მთავრობის ანტისახელმწიფოებრივი, დანაშაულებრივი, ქვეყნის ერთიანობის წინააღმდეგ მიმართული ძალადობრივი შეფასების გამო, იმის გამო, რომ მე ჩემი მოქალაქეობრივი პოზიცია დავაფიქსირე და პანკისელების მხარდამჭერ აქციაზე სიტყვით გამოვედი პარლამენტის წინ!", — წერს მაია სტეფნაძე.

მაია სტეფნაძე ასევე ამბობს, რომ ფეისბუქზე პოსტის გამოქვეყნებიდან სამ დღეში დაიბარა იმედის დირექტორმა გიორგი კალანდარიშვილმა და "პირდაპირ უთხრა, რომ სამსახურიდან მისი სტატუსის გამო უშვებდა".

"ამაზე მეტი ცენზურა რაღა უნდა იყოს! გამომიშვეს იმიტომ, რომ გავბედე და ჩემი აზრი ღიად გამოვხატე. იმედის ოფიციალურო და არაოფიციალურო მმართველებო, თქვენ გადაწყვიტეთ მე სანიმუშოდ დაგესაჯეთ, რომ ამ ხელისუფლების უტიფრად გამპრავებელი ტელევიზიის ვერც ერთმა რიგითმა პატრიოტმა თანამშრომელმა და ჟურნალისტმა, სამსახურის დაკარგვის შიშით, საკუთარი აზრის თავისუფლად გამოხატვა ვეღარ გაბედოს...
არ გამოგივათ!", — წერს მაია სტეფნაძე.

On.ge-ს ტელეკომპანია იმედის ეიჩარმა სალომე ბარეზაშვილმა განუცხადა, რომ მაია სტეფნაძის გათავისუფლების საფუძველი ურთიერთშეთანხმებაა.

"ეს ნიშნავს კომპანიასა და თანამშრომელს შორის არსებულ ურთიერთშეთანხმებას", — აცხადებენ სალომე ბარეზაშვილი. კითხვაზე, უარყოფს თუ არა ტელევიზია სტეფნაძის ბრალდებებს, ბარეზაშვილი ამბობს, რომ მეტ კომენტარს ვერ გააკეთებს.