"არ მგონია, რომ ახლა კიბერშეტევა იყოს. ვფიქრობ, რომ თვითონ ქალბატონი სალომეა კიბერშეტევა ქვეყანაზე", — ასე გამოეხმაურა დეპუტატი დავით ჭიჭინაძე პრეზიდენტის რეტვიტზე დაწყებულ მოკვლევას.

"ცოტა უნდა ჩამოყალიბდნენ, როცა კომენტარს აკეთებენ. მგონი, ჩვენს ძალოვან უწყებებს თავისი პრობლემები ეყოფათ, ახლა შინაგანი კიბერშეტევები რომ არ გავუჩინოთ საძიებელი. ასე რომ დავემსგავსებით შავ ოთახში შავი კატის ძებნას", — განუცხადა დეპუტატმა რუსთავი 2-ს.

საქართველოს პრეზიდენტის სალომე ზურაბიშვილის ტვიტერზე ტრამპის პოსტის რეტვიტის გამო შსს-მ მოკვლევა დაიწყო. უწყებაში განგვიმარტეს, რომ გამოძიება მაშინ დაიწყება, თუ დანაშაულის ნიშნები გამოიკვეთება.

შესაძლო კიბერთავდასხმაზე დღეს, საქართველოს პრეზიდენტის ადმინისტრაციის პრესსპიკერმა ხატია მოისწრაფიშვილმა მიანიშნა. მან თქვა, რომ პირველადი მოკვლევით ტრამპის რეტვიტზე შეცდომა სოციალური მედიის მენეჯერმა დაუშვა, თუმცა არც კიბერთავდასხმა გამორიცხა.

საქმე ეხება საქართველოს პრეზიდენტის ტვიტერის ოფიციალურ გვერდზე, აშშ-ს პრეზიდენტის განცხადების გაზიარებას, სადაც დონალდ ტრამპი კონკურენტს, პრეზიდენტობის კანდიდატ ჯო ბაიდენს "მძინარას" უწოდებს.