შინაგან საქმეთა სამინისტროს ინფორმაციით, მსახიობ ლევან ჯიბღაშვილის მანქანიდან ამოღებული ნივთიერებების ექსპერტიზა დასრულდა. უწყებაში On.ge-ს უთხრეს, რომ მანქანიდან 0,5659 გრამი კოკაინი და 0,1921 გრამი ექსტაზი (MDMA) ამოიღეს.

"განსაკუთრებით დიდი ოდენობა ნარკოტიკული საშუალება და ფსიქოტროპული ნივთიერება არ გამოვლინდა. გამოსაკვლევად დარჩა მცირე ოდენობით მარიხუანა, რომლის ექსპერტიზის პასუხს ველოდებით", — ამბობენ შსს-ში.

დაკავებიდან ამ დრომდე შინაგან საქმეთა სამინისტრო, პროკურატურა და ჯიბღაშვილის ადვოკატი არ ასაჯაროებდნენ, რამდენი და რა სახის ნარკოტიკული საშუალება ამოიღეს დაკავებულის მანქანიდან.

ლევან ჯიბღაშვილის ნარკოდანაშაულის ბრალდებით დაკავების შესახებ ინფორმაცია 22 აპრილს გავრცელდა. მას ბრალი სისხლის სამართლის კოდექსის 260-ე მუხლის პირველი ნაწილით წარედგინა, რაც ნარკოტიკული საშუალების უკანონო შეძენა-შენახვას გულისხმობს. ჯიბღაშვილს აღკვეთის ღონისძიების სახით 10 000-ლარიანი გირაო შეეფარდა. გირაოს შუამდგომლობა პროკურატურამ დააყენა, რაც თბილისის საქალაქო სასამართლოს მოსამართლე რომან ხორავამ ნაწილობრივ გაიზიარა. ჯიბღაშვილი ბრალს აღიარებს.