ენმ-ს წევრმა, თინა ბოკუჩავამ On.ge-სთან საუბარში განაცხადა, რომ პროკურატურის მიერ 26 მაისს მომიტინგეთა დარბევისა და მომიტინგეთა მასობრივი დაკავებების ფაქტზე, კუდის ყოფილი უფროსის, დავით ახალაიასთვის და სხვა მაღალჩინოსნებისთვის ბრალის წაყენება ხელისუფლების მიერ ქვეყანაში არსებული პრობლემების გადაფარვის მცდელობაა:

"ამ ეტაპზე, ასეთი საქმეების მანიპულირებით ისინი ზოგადად თავიანთი წარუმატებლობის გადაფარვას ცდილობენ. ისინი იმ პოლიტიკური განაჩენის შეცვლას ცდილობენ, რაც უკვე დამდგარია ბიძინა ივანიშვილის პოლიტიკური გუნდისთვის, რაც ძალიან მშვიდობიანად, მაგრამ ძალიან მტკიცედ გაფორმდება 8 ოქტომბერს".

ბოკუჩავას განცხადებით, ხელისუფლება თავისი უმოქმედობის გადაფარვას სწორედ ზემოაღნიშნული გადაწყვეტილებების მსგავსი ქმედებებით ცდილობს:

"მაგალითად, პაატა ბურჭულაძესა და ნიკა გვარამიას შორის შემდგარი სატელეფონო საუბრის ჩანაწერი ან კობახიძის მხრიდან მუდმივად საუბარი ენმ-ს თითქოსდა პროვოკაციების შესახებ".

დღეს პროკურატურამ საგანგებო განცხადება გააკეთა და განმარტა, რომ 26 მაისის საქმეზე ბრალდებულად ცნეს შემდეგი პირები: კუდის ყოფილი უფროსი დავით ახალაია, მისი მოადგილე ვასილ ლილუაშვილი, ამავე დეპარტამენტის თბილისის სამმართველოს უფროსი რევაზ შიუკაშვილი და მეორე სამმართველოს უფროსი ლევან ქარდავა.