ევროკომისია პარიზის ღვთისმშობლის ტაძრის აღსადგენად გრანტს გამოყოფს. როგორც ევროკომისიის პრესსამსახურში აცხადებენ, გრანტის ზუსტი ოდენობა ზარალის დათვლის შემდეგ გახდება ცნობილი.

ნოტრ დამის აღსადგენად 100 მილიონ ევროს გამოყოფს ფრანგი მილიარდერის, ფრანსუა პინოს ოჯახი. ასევე, ცნობილი გახდა, რომ ტაძრის აღსადგენად 10 მილიონს ილ დე ფრანსის რეგიონის ხელმძღვენლობას გამოყოფს.

გუშინ, 15 აპრილს საფრანგეთში, პარიზის ღვთისმშობლის ტაძარში ხანძარი გაჩნდა. პარიზის პროკურატურაში გამოძიების წინასწარ შედეგებზე დაყრდნობით აცხადებენ, რომ ტაძარში ცეცხლი შემთხვევით გაჩნდა.

მეხანძრეებმა ტაძრის სტრუქტურის სრული განადგურებისგან გადარჩენა შეძლეს. ხანძრის შედეგად, ტაძრის ხის სახურავი მთლიანად დაიწვა. პარიზის ღვთისმშობლის ტაძრის წარმომადგენლები აცხადებენ, რომ ხანძარი რელიკვიებს არ შეხებია.

პარიზის ღვთისმშობლის ტაძარი ცნობილი, როგორც ნოტრ დამი — გოტიკური საკათედრო ტაძარია პარიზის ილ-დე-ლა-სიტეს აღმოსავლეთ ნაწილში. ის დღემდე მოქმედი რომაულ-კათოლიკური კათედრალია/ პარიზის ნოტრ-დამი ფრანგული გოთიკური არქიტექტურის ერთ-ერთ ყველაზე დახვეწილ ნიმუშად ითვლება.