ფილარმონიის დიდ საკონცერტო დარბაზში ქართული ოცნებიდან წასულების, პარტიის ყოფილი მხარდამჭერებისა და მმართველ გუნდზე გაბრაზებულების შეკრება გაიმართა. შეკრების ორგანიზატორი მოძრაობა დაიცავი საქართველო იყო, რომელსაც სათავეში პოეტი დავით მაღრაძე უდგას.

ვინ ესწრებოდა

შეკრებას დავით უსუფაშვილი, ეკა ბესელია, გედევან ფოფხაძე, ზვიად კვაჭანტირაძე, ლევან გოგიჩაიშვილი, ვატო შაქარიშვილი, ჯაბა ჯიშკარიანი და ოცნებიდან წასული სხვა პოლიტიკოსები ესწრებოდნენ. დარბაზში ასევე იმყოფებოდნენ ის მომღერლები და მსახიობები, რომლებიც აქტიურად მონაწილეობდნენ ქართული ოცნების მხარდაჭერილი კანდიდატის, სალომე ზურაბიშვილის საპრეზიდენტო კამპანიაში. მათ შორის იყვნენ დათო ხუჯაძე, ნინი ქარსელაძე, მარიკა თხელიძე და გიორგი მურღულია.

რა თქვეს

შეკრებაზე პირველი სიტყვით დავით მაღრაძე გამოვიდა. მისი განცხადებით, მათი მიზანია, ხელისუფლებიდან ქართული ოცნება ისე გაუშვან, რომ ქვეყნის სათავეში არ დაბრუნდეს პარტია, რომელმაც საქართველოს დიდი განსაცდელი მოუვლინა.

"ასე მგონია და ასე ვხედავ, რომ დაიხუთა ეს ასპარეზი და დაიხუთა ახალგაზრდებისთვის, ვინაიდან ორივე პოლიტიკური ორგანიზაცია, რომელიც დღეს ჩემობს პოლიტიკური სივრცე მოიცვას, თითქმის, კერპთაყვანისმცემლობას ითხოვს", — თქვა მაღრაძემ.

მან შეკრებაზე იმედი გამოთქვა, რომ მოძრაობაში მურუსიძეები და ზარდიაშვილები არასდროს იქნებიან.

დარბაზში შეკრებილებს სიტყვით მიმართა ქართული ოცნებიდან ახლახან წასულმა ვატო შაქარიშვილმა. მისი თქმით, ქართული ოცნება მოსამართლეთა კლანის ოცნებების ასრულების ასპარეზად იქცა. მისივე თქმით, ეს დაპირება არ მიუციათ მოსახლეობისთვის საარჩევნო პერიოდში და ამიტომ, საჭიროა სათავე დაუდონ ახალ პოლიტიკურ ასპარეზს.

"ეს გზა, ჩვენ ყველანი შევთანხმდებით, რომ ტაძრამდე არ მიდის და სწორედ ამაზე შეშფოთებამ მოგვიყვანა ჩვენ ყველანი ამ დარბაზში", — განაცხადა შაქარიშვილმა.

მან სცენაზე ლევან გოგიჩაიშვილს მოუხმო და თქვა, რომ ის პარლამენტის ღირსეული წევრია. თუმცა, აქვე აღნიშნა, რომ ღირსეული პარლამენტი არ გვაქვს.

ქართული ოცნების ყოფილმა წევრმა, ლევან გოგიჩაიშვილმა განაცხადა, რომ პლატფორმა პოლიტიკურ მოცემულობას დაბადებს.

"დამოკიდებულება, როდესაც ღიად უჭერ მურუსიძეს მხარს და აცხადებ მსხვერპლად, ამას ჰქვია გამრუდება ყოფიერების, ცნობიერების, სამართლის, პრინციპების, ღირსების, მორალის —ყველაფერი გამრუდებულია. ამ სიმრუდემ რომ არ ჩამოშალოს ეს სახელმწიფო, არ მისცეს საშუალება, კიდევ უფრო მახინჯი აზროვნების ადამიანებმა ხელში ჩაიგდონ ძალაუფლება, ამისთვის ვფიქრობ, ეს პლატფორმა დაბადებს პოლიტიკურ მოცემულობას" — თქვა გოგიჩაიშვილმა.

დარბაზში მყოფებს სიტყვით მიმართა ოცნებიდან წასულმა კიდევ ერთმა პოლიტიკოსმა, ჯაბა ჯიშკარიანმა. მისი თქმით, დღეს ნაციონალური მოძრაობის რეანიმაცია და ქართულ ოცნებასთან შერწყმა ხდება.

"დღეს იქმნება პლატფორმა, რომელიც დიდ გამარჯვებას მოიტანს", — თქვა ჯიშკარიანმა.

შეკრებას შენების მოძრაობის ლიდერი, დავით უსუფაშვილი ესწრებოდა. მან განაცხადა, რომ "არაფერში გასაერთიანებლად არ მისულა, უბრალოდ მოსასმენად მივიდა".

"დავით მაღრაძემ შემომთავაზა მოსვლა და მოსმენა. მოვედი და მოვუსმენ. ასევე, ვუსმენ ყველას, ვინც თვლის, რომ ქართული ოცნება შესაცვლელია არჩევნების გზით, არა ნაციონალური რევანშით ან რუსული ზღაპრებით", — თქვა უსუფაშვილმა.

შეკრებაზე მყოფმა ეკა ბესელიამ განაცხადა, რომ ის არ გამორიცხავს იმ ადამიანებისგან შედგეს ახალი პოლიტიკური ერთობა, ვისაც მიაჩნია, რომ ქვეყანაში უკეთესი მომავალი უნდა იყოს.

"შესაძლოა, ეს მოძრაობა პარტიად არ გადაკეთდეს, მაგრამ ახალი პოლიტიკური ძალა იშვას იმ ადამიანების მონაწილეობით, ვისთვისაც ეს ღირებულებები დღესაც ისევე აქტუალური, მნიშვნელოვანია. ეს არის შემდეგი პროცესი, ამას არ გამოვრიცხავდი, მაგრამ არა ის, რომ დაიცავი საქართველო გახდეს პარტია", — განაცხადა ბესელიამ.

ქართული ოცნების ყოფილი წევრის, გედევან ფოფხაძის განცხადებით, ვინაიდან, დღეს ისევ აქტუალურია უსამართლობასთან ბრძოლა, ბუნებრივია, რომ საქართველოს დაცვისაკენ მოწოდება ისევ გაისმა.

"მეც ვუერთდები ამ ადამიანებს, მოვედი აქ ჩემს თანამოაზრეებთან ერთად, უნდა დავაფიქსირო ჩემი პოზიცია და შევუერთდე იმ განწყობას, რომელიც დღეს ფილარმონიის დარბაზშია", — აღნიშნა ფოფხაძემ.

შეკრებაზე მყოფმა გია გაჩეჩილაძემ თქვა, რომ "არის იქ, სადაც საქართველოს უჭირს და იდგება იქ, სადაც ამის აუცილებლობა იქნება".

"მეგონა, რომ ეს ადამიანი [ბიძინა ივანიშვილი] რასაც იძახდა, თავის სიტყვებს არ გადავიდოდა, წავიდოდა სააკაშვილი ხელისუფლებიდან და ის გადავიდოდა ოპოზიციაში. მისი ოპოზიციაში ყოფნა იქნებოდა იდეალური მისთვისაც და ქვეყნისთვისაც. ეს მან არ გააკეთა", — განაცხადა გაჩეჩილაძემ.

მომღერალმა, დათო ხუჯაძემ განაცხადა, რომ შეკრებაზე იმის გასაგებად მივიდა, თუ რა ხდება.

"ეს ქალაქი არ არის დიდი, ყველას ვიცნობ. იქიდან გამომდინარე, რომ არ ვადევნებ თვალს პოლიტიკას, მოვედი აქ, რომ გავიგო. მე ბევრი რამე არ მომწონს", — თქვა ხუჯაძემ.

შეკრებაზე მყოფმა მომღერლებმა, ნინი ქარსელაძემ და მარიკა თხელიძემ განაცხადეს, რომ ფილარმონიაში დაიცავი საქართველოს პოზიციების მოსასმენად იმყოფებოდნენ. შეკრების დასასრულს ორივემ აღნიშნა, რომ კვლავ ქართული ოცნების მხარდამჭერებად რჩებიან.

რა უნდა მოძრაობა დაიცავი საქართველოს

მოძრაობა დაიცავი საქართველოს შეკრება 14 მარტს დავით მაღრაძემ დააანონსა. მან თქვა, რომ 10 წლის წინ შექმნილი საზოგადოებრივი მოძრაობა გააქტიურდებოდა. მისივე თქმით, ის ბიძინა ივანიშვილს დღესაც პატივს სცემს, როგორც მოქალაქეს მისი დამსახურებების გამო, თუმცა, განმარტა, რომ მის პოლიტიკას აღარ იზიარებს.

შეკრებაზე მყოფმა პოლიტიკოსებმა და მხარდამჭერებმა განაცხადეს, რომ მათ სურთ ხელისუფლების შეცვლა, ოღონდ ისე, რომ სათავეში ნაციონალური მოძრაობა არ დაბრუნდეს. დამსწრეთა ნაწილმა იმედი გამოთქვა, რომ მოძრაობა პოლიტიკურ პარტიად გარდაიქმნება, ნაწილი კი ამას უარყოფს, მათ შორის დავით მაღრაძეც.