საქართველოს კათოლიკოს-პატრიარქი, ილია მეორე დღეს, 11 აპრილს ქართული ოცნების ლიდერს, ბიძინა ივანიშვილს შეხვდა. საპატრიარქოს განცხადებით, ივანიშვილი მზადაა, რომ სამების ტაძრის მოხატვა სრულად დააფინანსოს.

როგორც საპატრიარქოს განცხადებაშია აღნიშნული, შეხვედრისას საუბარი შეეხო ხალხის პრობლემებსა და ქვეყანაში არსებულ სოციალურ-ეკონომიკურ მდგომარეობას.

"შეხვედრაზე, ასევე, აღინიშნა, რომ ნებისმიერი სახელმწიფოსთვის და, მით უმეტეს, ჩვენი ქვეყნისთვის, უდიდესი მნიშვნელობა აქვს ოჯახის სიმტკიცის დაცვას და მომავალი თაობის სწორად აღზრდას; რომ სასიხარულოა, განათლების სფეროს ქვეყნისთვის პრიორიტეტულად გამოცხადება და ამ მიმართულებით დიდი სახსრების გაღება; და რომ პირველ რიგში აუცილებელია პედაგოგების ავტორიტეტის ამაღლება, ხელფასების გაზრდა და სასკოლო პროგრამების დახვეწა", — ნათქვამია განცხადებაში.

გარდა ამისა, პატრიარქმა ივანიშვილს სამების საკათედრო ტაძარში მიმდინარე სამუშაოებიც გააცნო, რომელიც ქართუ ბანკიდან ფინანსდება.

ფოტო: საქართველოს საპატრიარქო