მედიის განვითარების ფონდმა (MDF) ახალი კვლევა გამოაქვეყნა, სადაც 15 ყალბი პროფილია გამოვლენილი. კვლევის მიხედვით, გამოვლენილი 15 პროფილიდან 11 რუსული სოციალური ქსელების — ოდნოკლასნიკებისა (3) და VKontakte-ს (8) მომხმრებლების სახელსა და გვარს იპარავს, 2 — სერიალის პერსონაჟების, 1 — ფეისბუქმომხმარებლის და ჟურნალ ლიბერალის თანამშრომლის, ხოლო 1 — თავისუფალ ჟურნალისტთა სახლის ჟურნალისტისა და ბათუმის შოთა რუსთაველის სახელმწიფო უნივერსიტეტის სტუდენტის.

ფოტო: მედიის განვითარების ფონდი

ფოტო: მედიის განვითარების ფონდი

MDF-ის ცნობით, ამ სექციაში ყვითლად მონიშნულია ის პროფილები, რომლებიც ტროლებს მეგობრებში ჰყავთ დამატებული და ისინიც სხვა ადამიანების სახელსა და გვარს იპარავენ. ამასთან, კვლევის მიხედვით, ისინი ერთმანეთის ფოტოებს, კომენტარებს და პოსტებს იწონებენ და ერთმანეთთან ინტერაქციაში შედიან. კვლევის ავტორის თქმით, ეს ყველაფერი არ გამორიცხავს ვარაუდს, რომ აღნიშნული პროფილები ერთი ანგარიშიდან იმართება.

ფოტო: მედიის განვითარების ფონდი

კვლევის მიხედვით, გამოვლენილი ყალბი პროფილები მმართველი პარტიის ან ცალკეული უწყებების მხარდამჭერ გზავნილებს ავრცელებენ. ეს გზავნილები კი მმართველი პარტიის პოზიციებს ემთხვევა.

MDF-ის ინფორმაციით, ტროლები იდენტურ კომენტარებს ტოვებდნენ ბიძინა ივანიშვილის მიერ ბოტანიკური ბაღის მიერთების გეგმასა და აბასთუმნის ტუპდისპანსერის ადგილზე სასტუმროს აშენების შესახებ გავრცელებულ ინფორმაციაზე. კვლევის მიხედვით, ტროლები კომენტარებში ან გავრცელებული ინფორმაციის სიზუსტეს აყენებდნენ ეჭვქვეშ ან სასტუმროს აშენების მიზანშეწონილობას ასაბუთებდნენ.

ფოტო: მედიის განვითარების ფონდი

ფოტო: მედიის განვითარების ფონდი

კვლევის მიხედვით, ტროლები აქტიურად ალაიქებენ და აზიარებენ სხვადასხვა სამთავრობო ფეიჯებიდან ფოტოებსა და პოსტებს. 15-დან 9 ტროლს ყველაზე ხშირად გარემოს დაცვისა და სოფლის მეურნეობის სამინისტროს ოფიციალური ღონისძიებების ამსახველი ფოტოები აქვს ყველაზე ხშირად მოწონებული და ბევრ მათგანს უშუალოდ სამინისტროს პოსტები გაზიარებული.

ფოტო: მედიის განვითარების ფონდი

25 თებერვალს მედიის განვითარების ფონდმა კვლევა გამოაქვეყნა, სადაც გაშიფრული იყო სამთავრობო ტროლი Avtandil Kereselidze. ფონდმა დაადგინა, რომ რეალურად ეს ადამიანი არ არსებობს და ფოტოები მომხმარებელ Karo Manukyan-ს ეკუთვნის, რომელიც ერევანში ცხოვრობს. მოგვიანებით, ეს ყალბი პროფილი ფეისბუქიდან გაქრა.