რესტორან მაჭახელას ერთ-ერთ ფილიალში ორი ტრანსგენდერი ქალი არ შეუშვეს. გავრცელებულ ვიდეოში დაცვის წევრი მათ ეუბნება, რომ ისინი "ობიექტისთვის არასასურველი კლიენტები" არიან.

მაჭახელას წარმომადგენელმა, გიორგი გოგოლიძემ On.ge-ს უთხრა, რომ დაცვამ ისინი რესტორანში "ცუდი მოქცევის გამო" არ შეუშვა. ის აცხადებს, რომ ტრანსგენდერ ქალებზე ძალადობას ადგილი არ ჰქონია და არც დაცვის წევრი და არც პერსონალი მათ ხელით არ შეხებია.

"ბევრ ობიექტზე დადიოდნენ ეგენი, ქალბატონები არიან თუ ვაჟბატონები. არც ერთ მაგათი სტუმრობა ჩვენთან ისე არ დამთავრებულა, რომ მოქცეულიყვნენ ისე, როგორც ნორმალური ადამიანი იქცევა რესტორანში. ყოველთვის იყო ინციდენტები", — აცხადებს მაჭახელას წარმომადგენელი.

ის ერთ-ერთ არგუმენტად ამბობს, რომ აღმაშენებლის ფილიალში ტრანსგენდერი ქალები სიგარეტს ეწეოდნენ, რის გამოც პოლიციის გამოძახება გახდა საჭირო.